US-in China thlawhtheihna thlawh khap dawn
US president Donald Trump kaihhruai sorkar chuan June 16 aṭangin an ramah China thlawhtheihna thlawh luh a khap dawn tih nimin khan a tarlang.
Chinese aviation thuneitute chuan US thlawhtheihnate chu an thlawh ṭhinna kawnga thlawh an lo phal lo hmasa a, hei vang hian US chuan a ram chhunga China thlawhtheihna thlawh hi a rem lo tih a tarlang zui ve ta a ni.
US Transportation Department chuan China lamin an thlawhtheihna thlawh tir an phal hunah US chuan China thlawhtheihna thlawh tir a phal ve mai dawn niin thuchhuah a siamah a tarlang. Civil Aviation Administration of China (CAAC) chuan ram chhung Covid-19 a darh zel lohna tura invenna atan, March thla laihawl aṭang khan kar khatah ram pawn aṭanga khualzin phur thlawhtheihna pakhat chauh luh an phal thu a tarlang a ni.
June 1 aṭang khan United Airlines leh Delta Air Lines chu thlawh tir leh ṭan an ni a, US aṭanga China-a thlawk lut tur United Airlines leh Delta Air Lines-te hi CAAC lam chuan thlawh luh an lo phal lo a ni. Hei vang hian US chuan an ram chhunga Covid-19 darh zel loh nan, China thlawhtheihnate chu an ram chhunga thlawh luh tir a phal lo zui ve ta a ni.