UN hotuin Covid-19 do turin Ram zawng zawng a sawm

World Health Orga­nization (WHO)-in Covid-19 chu tunlai khawvela natna hri leng darh hnem ber a nih thu kar kal ta Nilainia a puan hnuah, UN Secretary-General Antonio Guterres chuan Covid-19 do kawngah khawvela ram zawng zawngte ṭangtlang turin a sawm.

"Kan awmna ram ṭheuhah kan vaiin health lam thuneitute thurawn ngaichang rengin, he hri leng mek dona kawnga mipuite tih tur min hrilh ang angte chu, inlungrual taka kan zawm 

ṭheuh a hun tak zet a ni." tiin Guterres chuan a sawi.

Kum 70 chunglamte inkhung hrang turin ngen 

Covid-19 leng mek hi kum upa lam ten an kai awlsamin a thihpui zinga tam zawk pawh an ni. Hei vang UK chuan hri leng mek laka kum upa zawkte an himna turin, kum 70 chunglamte inkhung hrang turin a ngen dawn tih health secretary Matt Hancock chuan a sawi. 

UK-ah hian kar liam ta Inrinni thleng khan Covid-19 vanga thi hi mi 21 an tling tawh a, an vai hian kum 60 chunglam vek an ni. Hancock chuan kum upa zawkte khung hran hi an dinhmun an ngaihtuah pui vang zawk a ni, a ti. 

Australia prime minister Scott Morrison chuan an rama Covid-19 darh zel tur venna kawng atan, ram dang aṭanga an rama lut hrim hrim chu ni 14 chhung dah hrang zel phawt turin thupek a tichhuak. Australia-ah hian he hri vang hian mi pathum an thi tawh a ni. Ram dang lawngliante chu ni 30 chhung Australia lawng chawlh hmunah chawlh phalsak an ni dawn lo bawk. 

Israel chuan an ram chhunga Covid-19 kaite zawnchhuahna atan anti-terrorism tracking technology a hmang dawn. 

Prime minister Benjamin Netanyahu chuan he hri kai tawhten inkungkaihna an lo neihpui tawhte dapchhuahna atan cyber technology hman a ni tawh tih a sawi a, mahse hei hian damlote privacy a khawih tel dawn avangin justice ministry phalna pawh an la tel phawt dawn tih a sawi. Israel security service, Shin Bet chuan Netanyahu leh health ministry ngenna angin, an technology hi hman turin an enfiah mek tih a tarlang bawk. 

Covid-19 darh ṭanna, China-ah chuan hri leng hian ziaawm lam panin, a kai  thar pawh an tlahniam tawh hle. Hetih lai hian Europe lamah a vanglai a thleng mek thung. 

China chuan hri lenna ram dangte ṭanpui hna a theih angin a thawk zui a, Europe-a Covid-19 len nasatna, Italy-ah chuan medical team a tir tawh a, hri leng mek dona kawnga hmanraw mamawh ton 30 zet a thawn bawk. Italy bakah Spain-ah pawh hmanrua hi thawn a ni dawn. 

Chinese sumdawng lian, Alibaba Group dintu Jack Ma chuan hri leng avanga kar liam ta Zirtawpnia national emergency puanna, USA tan coronavirus testign kit 500,000 leh mask maktaduai khat a thawh dawn tih a sawi. Jack Ma pawlte hian a hma pawhin hri lenna ram, Japan, South Korea, Italy, Iran leh Spain-ah heng hmaruate hi an lo thawn tawh bawk a ni. 

Covid-19 hi ram 153-ah a darh tawh a, he hri kai hriat tawh zat hi mi 157,213 an tling tawh. Mi 5,843-in an thih pui tawh bawk. China dawta hri leng vanga thi tamna ber, Italy-ah chuan mi 1,441 an thi tawh a ni. Hri kai mi 75,940 chu enkawl dam an ni tawh bawk tih worldometer chuan a tarlang.