Taliban jail tang chhuah hun tur sawn hla

Kar kal ta Inrinnia chhuah tura tih, Taliban firfiak 1,500-te chu Af­gha­nistan sorkar chuan an chhuah hun tur a sawn hlat sak.

Afghanistan sorkar ruahman lawk dan chuan Taliban firfiak an man mi 1,500-te chu March 14 aṭangin a taltawla chhuah tura tih a ni. Mahse jail tang an chhuah tur-te hming list hi uluk taka en ṭhat leh a ngaih avangin a hun hi sawn hlat a nih thu Afghanistan Chief Executive's Deputy thu­puangtu Javid Faisal chuan a sawi.

US leh Taliban-ten inremna an siamah, Ta­liban firfiak leh Afgha­nistan sorkarin an mi mante an inthlengna tur telh a ni. An inremna siam hi Afghanistan sorkar chuan ngunthluk taka a ngaihtuah hnuah tun thla tir khan Afghanistan president Mohammad Ashraf Ghani chuan Tali­ban jail tangte chhuah tur an nih thu hi a sawi ta a ni.

President Ghani-a'n chhuah tura thuchhuah a siam khan Taliban firfiak an man mi 5,000-te chu a tahtawla chhuah tura tih an ni a, heng jail tang chhuah hmasak tura tih mi 1,500-te hi March 14 aṭanga chhuah ṭan tura tih an ni. Afghanistan sorkar leh Taliban inkar boruak hi a ṭhat chho zel chuan kar hnih danah jail tang dang mi 3,500 la awm aṭangin mi 500 chhuah zel tura tih a ni bawk.

Taliban lam hian Pre­sident Ghani thuchhuah hi an ṭawmpui lo thung a, Afghanistan sorkar hmalakna hian US nena inremna an lo siam tawh chu a kalh tih Taliban thupuangtu Suhail Sha­heen chuan a sawi. February 29 khan US leh Taliban firfiakte chuan inremna an ziak a, kha inremna an ziahah khan March 10-ah Taliban jail tang 5,000 leh Afghanistan security force jail tang 1,000 inthlengna neih fel tur, tih ziah tel a ni. He hi Taliban lam chuan hre rengin Afghanistan sorkar hmalakna chu US nena an inremna an ziah kha a kalh thu an tarlang a ni. Hemi chhan let nan hian Afghanistan sorkar chuan thuchhuah siam vein, jail tang chhuah tur chungchangah US-in thu neihna an neih loh thu a tarlang thung.