NKorea hotuin SKorea president zin turin a sawm

North Korea ram hotu lu ber, Kim Jong-un chuan South Korea President Moon Jae-in chu a hun remchangah an rama zin turin a sawm.

SKorea president thupuangtu, Kim Eui-kyeom chuan Winter Olympics hmang tura kal, North Korea hotu Kim Jong-un-a farnu, Kim Yo Jong chu President Moon hian a Seoul-a a chenna inah lo dawngsawngin an inkawm nghal niin a sawi. Kim-i hian a u, Kim Jong-un-an zin tura a sawmna lehkha a thawn chu President Moon hi a pe a, NKorea ram hotu chuan a theih anga hmaa SKorea President chu hmuh a duh thute pawh a hrilh nghal a ni.

President Moon hian Winter Olympics hmanga kal, NKorea palaite hi meeting alo neihpui a, NKorea palaite hi Supreme People's Assembly president Kim Yong Nam-an hoin, Kim Yo Jong bakah senior official National Sports Guidance Committee chairman Choe Hwi leh Committee for the Peaceful Reunification of the Fatherland chairman Ri Son Gwon-te pawh an tel. Meeting hi president chenna-in, Blue House-ah neiin chaw chhun an eiho nghal bawk. Hei hi kum riat leh a chanve hnua NKorae palaiten SKorea president chenna in an tlawh lehna hmasa ber a ni.