Tunisia President Saied-a'n PM a ban; Parliament tihtawp lailawk a ni

Tunisia president Kais Saied chuan Pathianni khan an ram prime minister Hichem Mechichi chu a ban a, ramchhunga polictics buaina leh khawpui ṭhenkhata lungawi lohna lian tak chhuak mek avangin Parliament chu a titawp lailawk.

President Kais Saied chuan prime minister thar hnuaiah thuneihna pumhlum a chan leh tur thu a sawi. Kum 2014-a ram danpui siam chuan president, prime minister leh parliament-in thuneihna hi a lo ṭhendarh tawh a ni.

"Ralthuam hman tum emaw silai hmetpuak an awm chuan sipaite chuan silaimu hmang vekin an chhanglet ang che u" tiin President chuan a sawi.

Saied leh prime minister Hichem Mechichi-te hi politics thilah kum khat chuang innghirnghona an lo nei tawh a, an ram economy lama harsatna an tawh lai leh, ram chhiah chungchang buaina leh Covid-19 hripui leng an thunun hneh theih loh avangin buaina an tawk chho reng a ni.

President chuan PM a ban chungchangah ram danpui zulzuia thilti a nih thu sawiin, parliament member-te thubuai siam sak theih loha humna pawh a tihtawp lailawk bawk.

Kum 2019 khan President leh Parliament member-te hi a hran ve ve thlan tlin an ni a, Mechichi hian nikum nipui lai khan PM atan hian lakluh a ni.

Tunisia Parliament Speaker Rached Ghannouchi hian President Saied-a thiltih dan hi sawiselin, Parliament che thei loa a siamna chu a duh dan anga sorkar thlak leh ram rorelna thlak danglam tumah a puh.