Israel sipaiten Gaza-a Hamas hmun kap

Israel sipaite chuan Pathianni khan Gaza Strip-a Islamic Resistence Movement (Hamas) military base an kap tih an sawi. Hei hi Gaza Strip aṭanga Israel chhim lamah balloon alh chhuah a nih avanga an chhan letna a ni.

Thuchhuah siamin, Israel sipai thupuangtu chuan indo thlawhtheihna hmangin Hamas hmun pawimawh bakah, pawikhawihna hmanrua an dahnate an kap tih a sawi a ni. He base hi civil chenna hmun hnaih, school awmna hmun hnaia awm a nih thu a sawi bawk.

Israel Fire Department chuan Gaza aṭanga balloon alh chhuah hian Israel chhim lam hmun thumah kangmei a tichhuak tih sawiin, mihring hliam erawh an awm lo tih a sawi.

Gaza Strip aṭanga beihna chu an chhang let zel dawn tih Israel sipaite chuan an sawi a ni.

Pathianni vek hian Israel chuan Gaza-a fishing zone chu a tihzim sak bawk. Fishing zone hi nautical mile 12 aṭangin nautical mile 6-ah tihzim a ni a, hei hi Gaza aṭanga Israel beih chhunzawm a nih fo vang tih an sawi bawk a ni.

Gaza Strip-a pawikhawihna leh he hmun aṭanga Israel beihna thlengah rorellai, Hamas chu mawhphurtu a nih thu sawiin, Israel an beihna nghawng hi an tuar ve zel dawn tih Israel sipaite thuchhuah chuan a tarlang.

Hetih lai hian Hamas lam chuan Israel-in Gaza Strip a hrekna a tinat zel chuan buaina nasa zawk a chawk chhuak dawn niin an sawi. Hamas thupuangtu Abdulatif al-Qanou chuan Gaza hrekna te hlip turin Israel a phut thu leh, May thlaa Egypt sorkar hmalakna hnuaia Israel leh Palestinian pawl hrang hrangten inkahhai an lo puan tawh chu zah tur leh zawm turin an phut tih a sawi bawk.