World Heritage Site-ah hmun pali puang thar

United Nations Educational, Scientific and Cultural Organisation (UNESCO) chuan Pathianni khan China, India, Iran leh Spain-a cultural site pali chu World Heritage Site-ah a puang.

Thuchhuah siamin, UNESCO chuan Song-Yuan China-a 'Quanzhou :Emporium of the World', India-a 'Ramappa Temple', Iran-a 'Trans-Iranian Railway" leh Spain-a "Paseo del Prado and Buen Retiro" te chu list-ah hian telh thar an ni tih a sawi.

'Quanzhou :Emporium of the World' hi AD 10-14 inkara sak a ni a, he hmunah hian sakhaw building-te a awm a, heng zingah hian China rama Islam hmun pawimawh neih hmasak, kum zabi 11 hunlaia sak Qingjing Mosque pawh a awm tel.

Ramappa Temple hi India rama Telangana state-a Palampet thingtlang khuaa awm niin, Shiva temple a ni. Rudradeva leh Recharla Rudra-te rorelna hnuaia an awm lai, kum 1123-1323 hun laia sak a ni. Regional dance custom leh Kaktiyan culture tarlanna lemziak hmuh turte pawh a awm.

Iran rama Trans-Iranian Railway hi tlang pahnih kaltlanga Caspian Sea leh Persian Gulf thlunzawmtu niin, kum 1,394-a thui a ni. Kum 1927-ah siam ṭanin, 1938-ah siam zawh a ni. He relkawng hi Iran sorkar leh ram hrang hranga construction contractor 43-ten an siam a ni, hmun chhengchhia leh awih tak takte a paltlang a ni. Tunnel 224 zet paltlangin heng zinga 11 chu spiral tunnel an ni.

Paseo del Prado and Buen Retiro hi Madrid khawpui lailia awm niin, ram hectare 200-a zau cultural landscape-ah hian Prado museum a awm a, Retiro Park hi khawpui chhunga tlawhtu ngah ber zinga mi a ni ṭhin. A chhunga hectare 120-a zau Jardines del Buen Retiro (Garden of Pleasant Retreat) chu 17th century hun laia Buen Retiro Palace chuangbang a la ni a, 19th century aṭanga tun hun thlenga gardening style hrang hrang pholan a ni bawk. He hmunah hian Royal Botanical Garden pawh a awm bawk.