Myanmar sipaiin an ram inthlanpui result an hnawl

Myanmar-a sipai sorkar chuan kum 2020-a an ram inthlanpui neih, Aung San Suu Kyi-i party, National League for Democracy (NLD) in hnehna an channa result chu an hnawl tih a puang. Inthlanpui neih hi a felfai tawk lo tiin an sawi.

NLD kaihhruai civil sorkar thuneihna hi sipaite hian February 1 khan an lo hnehchhuh tawh a, hruaitu eng emaw zat manin an zingah hian Suu Kyi pawh a tel a, tun thlengin pawn chhuak thei loa hren a la ni.

Sipai sorkar hnuai election commission chuan, NLD-in hnehna an channa inthlanpuiah hian dik lo taka thiltih leh inbumna thil, case maktaduai 11 an haichhuak niin an sawi.

"NLD hian NLD ni lo party dang leh candidate-te lak aṭangin thuneihna hi laksak ngei an tum a, hemi atan hian Covid-19 khuahkhirhna siamte pawh bawhchhiain dik lo takin an hmang a ni. 2020 inthlanpui hi dik leh thianghlim taka neih a ni lo tih finfiah a nih avangin result pawh hi hnawl a ni ta a ni," tiin commission chairman Thein Soe chuan a sawi a ni. Inthlanpui neih leh hun tur chungchang erawh a sawilang tel lo.

Myanmar sipaite hian civil sorkar an paihthlak hnuah, kum, hnih chhung ngeia inthlanpui buatsaih leh a nih tur thu an lo sawi tawh a, hemi rual hian NLD party hi ṭhiahsakah an vau chhunzawm bawk.

Kum 2020, November thlaa inthlanpuiah khan NLDA hian elected seat 1,117 awmah seat 920 lain hneh taka thlan tlin an ni. Sipai thlawp Union Solidarity and Developmetn Party (USDP) chu an hneh a, mahse USDP hian inthlanah hian thil dik tawk lo leh langtlang lo thil a awm nia sawiin an sawisel a, inthlan ṭhat an phut. Mahse inthlan neihpuitu, indepedent observer-te chuan inthlan hi a felfai tawk a, mipuiten an aiawh tura an duhte an thlang chhuak a ni, a ti thung.

Suu Kyi hi sipaiin rorelna an hnehchhuh aṭang khan hren a la ni a, thubuai eng emaw zat siamsak ni tawhin coronavirus inkaihhruaina bawhchhiaah leh walkie talkie kawlru-ahte puh a ni a, hei bakah thubuai rip tak tak siamsak tel a ni bawk. A thubuaiahte hian thiam loh chantir a nih chuan kum 10 chuang lung-in tantir theih a ni ang.

Civil sorkar paihthlak a nih aṭang khan Myanmar-ah hian buaina a lo chhuak fo tawh a, lungawi lohna lantirtu zinga mi 900 chu sipaiten an that tawh tih local monitoring group chuan a tarlang.

Tualchhung buaina thleng mek karah, Covid-19 hri leng hluar chho mek chuan harsatna leh chhiatna nasa tak a thlen chho leh a, medical staff-ten nawrhna an huaihawt avangin damdawi-in te chu luah lohin a awm mek a ni.

Coronovirus hri leng thawh thumna leh civil sorkar rorelna paihthlak avanga mipuite lungawi lohna lantir avanga tualchhung buaina thleng zel avangin Myanmar economy hi kum 2021 chhungin 18% vela a tlakhniam hman an rin thu World Bank chuan Thawhṭanni khan a sawi.

Kum 2020 chhung khan NLD hian kum 2015-a inthlanpui nena tehkhin chuan an mahni vote tute chu nasa takin an pun belh hman a ni.