Korea ram pahnihten cross-border hotline tinung leh

South leh North Korea ramte chuan kum khat chuang zet cross-border hotline an lo tihtawp tawh chu nimin aṭang khan an tinung thar leh.

Korea ram pahnihte hian hemi chungchangah hian thuchhuah siam ve vein, inter-Korean communication channel zawng zawng chu ram pahnih hruaituten inremna an siam angin tihnun leh vek a ni tih a sawi. Hei hian Korea ram pahnihte inkarah rah ṭha tak a chhuah chhoh an beisei thu an sawi bawk.

Thla 13 liam ta khan NKorea sorkar chuan SKorea lam aṭanga an ram sawiselna leaflet-te ramri aṭangin activist-ten an thawn luh ṭhin avanga lungawi loin communication channel hi a titawp vek a ni. Mahse kumin April thla aṭang khan SKorea president Moon Jae-in leh NKorea hotu Kim Jong-un te chuan boruak ṭha siam turin lehkhate an inthawn tawn a, nimin khan cross-border hotline-te pawh hawn a ni leh thei ta a ni.