World Bank-in ram rethei hnena Covid-19 vaccine pekna a tum dawn

World Bank financing mechanism thar chuan ram ṭhanglai ten Covax facility kaltlanga Covid-19 vaccine man tlawma a hlawma an lei belh a phalsak dawn.

Ram ṭhanglai 92-ten hripui laka an invenna tur coronavirus vaccine an hmuh theihna turin Covax hi din a ni a, a senso hi donor-ten an tumsak a ni.

Ruahmanna thar hnuaiah hian heng ramte hian Covax kaltlanga man tlawm zawka vaccine-te an dawn tur zat bithliah chin lamah, a hranpain vaccine dose an lei belh leh thei dawn a ni.

World Bank leh development bank dangte ṭanpuina sum hmangin facility hian an ram mamawh dan azirin vaccine siamchhuaktute hnen aṭangin vaccine hi semchhuah turin an lei lawk dawn tih a sawi.

World Bank ruahmanna hnuaiah vaccine dose maktaduai 430 emaw mipui maktaduai 250-in vaccine dose kima an lak theihna tura ruahmanna hi 2021 kumtawp lamah emaw 2022 kum laihawlah emaw ram 92-te hian donors kaltlangin a awm thei ang. Ramte hian an duhdan milin vaccine lei turte hi an thlang thei bawk ang.

Covax hi World Health Organization (WHO), Gavi vaccine alliance leh Coalition for Epidemic Preparedness Innovation-te ṭangkawpin an din a ni.

Hetih lai hian vaccine-te rualkhai taka sem a nih loh avangin WHO chu a lawm lo hle a ni. Ram 216-ah vaccine hi dose tluklehdingawn 3.9 dawn sem chhuah ani tawh. World Bank sawi danin, ram hausaah mi 100 zela 95.4 in vaccine dose an dawng tawh a, ram retheiah chuan mi 100 zela 1.5 chiahin vaccine hi an la la thung..

Covax kaltlang hian Thawhṭanni thleng khan territory 136-ah vaccine dose maktaduai 138 sem a ni tawh a, mahse an semchhuah tum zat erawh an la pha lo hle.