Australia: Ram kanga thite Hriatrengna hun hmang

Australia Parliament-ah nimin khan tunlaia an rama ram kang vanga thi, mi 33-te hriat­rengna hun hman a ni a, hemi hnu hian inkhawm hi tihtawp zui a ni.  

Australia ram khawchhak lamah hmun 100 velah kang mei hi a la chhuak reng a, ṭhelh hna thawk chhunzawm reng a ni. 

Prime minister Scott Morri­son chuan 2019/20 nipui chu an ram tana nipui duhawm lo tak a ni tih sawiin,  ram kang te chu la mit loin a hlauhawmna pawh la reh lo mah se, kangmei chhuaka thi te hriatrengna leh kangṭhelh hna thawktute zahna an hlan tih a sawi. Ram kang ṭhelhna kawnga puitu ram hrang hrangte chungah lawmthu a sawi bawk. 

Morrison chuan state leh territory hruaitute hnenah kang­mei chhuak chungchanga official-te hmalak dan, emer­gency service tirh a nih dan te, sorkar laipui hmalakna leh climate change in nghawng a neih dante sawiho tura hriattir an nih thu a sawi. 

Nikum September thla aṭanga Australia rama ram kang hian ram hectare maktaduai 12-a zau a tichhe tawh a, chenna ni 2,500 kangin, ramsa chi hrang hrang tluklehdingawn khat vel zet an kanghlum tawha chhut a ni. Ram a kan hnuah hian PM Morission chu Hawaii-ah chawlh hmang turin a zin a, hei hian sawisel pawh a tawk nasa hle a, PM pawhin an ram mipuite hnenah ngaihdam a dil phah hial a ni. 

Australia khawchhak lamah kang mei hi la chhuak mah se, khaw lum lutuk a ziaawm chhoh avangin heng ram kangte hi an hlauhawm tawh lutuk lo niin thuneitute chuan an sawi.