South Africa President Zuma bang turin phut

South Africa-a rorellai African National Congress (ANC) chuan an ram President Jacob Zuma chu bang turin an ngen dawn.

ANC party official-te hian President Zuma chungchang hi ngaihtuahin ṭum eng emaw zat inbiakna an lo nei tawh a ni. Kum 75 mi, Zuma hian party ngenna hi a zawm duh lo anih chuan, Parliament-ah rintawk lohna motion putluh a ni ang a, he fiahna hi a paltlang zawh loh rin a ni bawk.

Jacob Zuma hian kum 2009 aṭang khan South Africa ram hruaitu dinhmun a chelh tawh a, mahse eirukna hrang hranga inhnamnawiha puh a ni.

Nikum December thla khan ANC hruaitu thar atan hian Cyril Ramphosa chu thlan a ni a, hemi hnu hian party pawh hian Zuma hi bang turin a lo ti fo tawh a, mahse official erawh chuan ngenna hi an la siam lo. Official-a ngenna hi nizan khan Zuma hi an pek rin a ni.

Kum 2016 khan South Africa court sang ber chuan Zuma hi a mimal in cheina atana sorkar sum a hmante a rulh leh loh avangin ram danpui palzutah a lo puh tawh a, hemi kum vek hian Supreme Court of Appeal chuan kum 1999-a ralthuam lei chungchangah eirukna, inbumna, dik lo taka sum thawnkuala puhna thubuai 18 siamsak turin a lo ti bawk.

Zuma hi ANC president ni tawh lo mah se, South Africa president term hi nakkum kum laihawl thleng a la nei a ni. Mahse ANC National Executive Committee chuan president aṭanga bang tura hriattir turin thuneihna a nei a ni. Kum 2008 hian ANC hian Zuma kaihhruaina hnuaiah President hlui Thabo Mbeki chu a lo ban tir tawh bawk a ni.