Iraq-in indin thar leh nan dollar tld 88 mamawh

Iraq official-te chuan Islamic State (IS) firfiak pawl nena kum thum chhung an indo hnuah, an ram din thar leh nan US dollar tluklehdingawn 88.2 mamawh a ni dawn niin an sawi.

IS firfiakte hian Iraq ram hmun thuma ṭhena hmun khat zet an la hman a, hengte hi laklet leh tumin Iraq sipaite chuan beihpui thlakin nasa takin an inbei a ni. Firfiakte leh sipaite inbeihnaah hian thil tam tak tihchhiat a nih bakah, an ram sum dinhmun pawhin a tuar nasa hle. Nikum December thla khan Iraq sorkar chuan IS laka hnehna a chan thu hi a puang a, kum 2014 leh 2015-a firfiakten an ram an lakte pawh chhuh let sak vek an ni tawh tih a sawi a ni.

Iraq ram economy leh infrastructure-te din thar leh dan ngaihtuah hian Kuwait-ah donor leh investor-ten conference an nei a, he hunah hian Iraq planning ministry director-general Qusay Adulfattah chuan hmanhmawh taka dollar tluklehdingawn 22 mamawh a nih thu leh, a hnu lama thawh chhunzawmna tura dollar tluklehdingawn 66 dang mamawh a ni dawn thu hi a sawi. Iraq hian conference-ah hian a project thawh tur 157 a tarlang bawk a, heng zingah hian Mosul airport siamṭhatna tur te, in, damdawiin leh school sak ṭhatna tur te, ṭhalaite tana hna thawh tur siamsakna turte pawh a tel.

IS firfiak leh Iraq sipaite indona avang hian chenna in 138,000 vel a chhia a, tun thlengin indona avanga tlanchhia mi maktaduai 2.5 vel chu in leh lo nei loin an la awm mek bawk a ni. Non-governmental organisation-te chuan tualchhunga indona thlenga vanga harsatna tawkte chhawmdawlna atan hian US dollar maktaduai 330 pek an tiam.