Israel PM Netanyahu-a eiruk thubuai siamsak rawt

Israel police-te chuan an ram Prime Minister Benjamin Netanyahu-a chu eiruk leh inbumna hmanga thiltia puh a nih chungchangah thubuai siamsakna turin finfiahna ṭha tak a awm niin an sawi.

Police-te chuan PM Netanyahu chu thamna laa puh chungchangah thubuai siamsak a ni tur a ni, an ti. Mahse Netanyahu chuan an puhna te hi thu belhchian dawl lo a ni a, prime minister hna a thawh chhuzawm zel tur thu a sawi thung.

PM Netanyahu an puhna zingah hian Israel newspaper, Yediot Aharonot publisher hnenah a chungchang leh a kaihhruai sorkar hnathawh dante a ṭha zawnga tichhuak turin a ngen a, hemi chhanletna atan hian chanchinbu dang a elpuite aia chungnung zawka dah a tiam nia sawi a ni. Police-te chuan he chanchinbu editor, Arnon Mozes pawh thubuai siamsak a ni dawn niin an sawi.

Hei bakah hian Netanyahu hian Hollywood producer Arnon Milchan leh midangte hnen aṭangin thilpek shekel maktaduai chuang hu a dawng nia puh a ni bawk. A thilpek dawn zingah hian champagne leh cigar-te pawh a tel niin Jerusalem Post chuan a tarlang a, hei hi Netanyahu-an Milchan hi US visa a hmuh theihna tura a puihna vang nia tarlang a ni bawk. Milchan hi Fight Club, Gone Girl leh The Revenant film producer a ni a, thamna a pek vang hian thubuai siamsak a nih ve tur thu police-te chuan an sawi bawk.

Milchan hnen aṭanga thilpek tam tham tak a dawn hnuah, Netanyahu hian Milchan Law siam turin a nawr a, he dan hnuaiah hian Israel mi, ram pawn aṭanga an rama cheng tura rawn kir te chu kum 10 chhung chhiah awltir rawt a ni a, mahse a rawtna hi finance ministry lamin a lo dansak a ni.

Police-te chuan Netanyahu hi Australian billionaire James Packer hnena aṭanga thilpek dawngah an puh bawk a, Israel Channel 10 chuan nikum December thla khan Packer hian investigator-te hnenah PM leh a nupui Sara-i chu thilpek a pek thu a hrilh niin a tarlang.

Hetih lai hian prime minister term hnihna chelh mektu, kum 68 mi Netanyahu chuan hun eng emaw chen aṭang khan dik lo taka thiltia puhna 15 vel zet a tawh thu leh, thu pawh zawhfiah a nih fo thu a sawi. Mahse an puhna ṭhenkhat chu tun ṭuma mi ang bawk hian police-te rawtna siamah a zo mai a, thubuai siamsak an tumna hrang hrangte chu a dik tawk loh ṭhin avangin a tawp leh mai ṭhin tih a sawi. Tun ṭum ami pawh hi engmah loa a tawp leh mai tur thu a sawi bawk.