Duterte-an ICC hmachhawn hlau lo

Philippine President Rodrigo Duterte chuan International Criminal Court (ICC)-a a laka complaint an thehlut chuan a tihlau lo tih sawiin, an ram mipuite ṭhatna leh himna tur a nih dawn phawt chuan ICC hi hmachhawn leh thiam loh chan pawh a inhuam tih a sawi.

Malacanang presidential palace-a thu a sawiah Duterte chuan, "Min ngaihtuah suh u. ICC hmachhawn chu ka inpeih reng a ni. Thubuai min siamsak a, thiam loh min chantir an duh a nih pawhin a ṭha ve e. Kan ram chhanna tur chuan lawm takin ka dawng vek ang", a ti.

Duterte hian Philippine President atana lakluh a nih hnu lawkah an rama ruihhlo do beihpui a thlak nghal a, beihpui an thlaknaah hian ruihhlo zuar nia rinhlelh mi tamtak chu sorkar phalnain police-ten an that nia sawi a ni. Hei vang hian ICC-ah hian complaint thehluh a ni a, ICC hian a chhui chiang dawn nia sawi a ni.

Philippine President chuan ICC avang chuan an rama ruihhlo do beihpui an thlak chu a tihtim phah dawn lo tih a sawi a, President a nih chhung chuan ruihhlo a do chhunzawm zel dawn tih a sawi.