Saudi Arabia-in Covid hluarna rama zinte a hrem dawn
Saudi Arabia sorkar chuan Covid hluarna ram, 'red list'-a telh rama zin luite chu kum thum chhung ram danga zin thei lo turin a hrem dawn.
Ram chhungah hri darh tur leh variant thar kai venna turin Saudi Arabia sorkar chuan hri leng hluarna ram, Afghanistan, Argentina, Brazil, Egypt, Ethiopia, India, Indonesia, Lebanon, Pakistan, South Africa, Turkey, Vietnam leh United Arab Emirates-te chu 'red list'-ah dahin, heng rama zin hi a khap a ni.
Interior ministry offcial pakhat chuan nikum March thlaa khuahkhirhna an lo siam tawh thlahdulin, kumin May thla aṭang khan phalna la hmasa kher loin mipuite chu ram pawnah zinchhuah phalsak an ni, a ti. Hemi rual hian red list-a tel ramah erawh zin a khap thung.
Official chuan dan bawhchhia a, list-a tel rama zinte chu an rama an let leh hnuah na taka hrem an ni dawn a, kum thum chhung ram pawn lamah zin chhuah khapsak an ni dawn tih a sawi.
Mi maktaduai 30 vel chenna, Saudi Arabia ramah hian Thawhlehni khan hri kai thar mi 1,379 an awm a, hri kai hmuhchhuah 5,20,774 leh thihpui 8,189 an awm tawh a ni.
Hri kai an tam lai, nikum June thlaa ni khata kai thar 4,000 chuangte an awm hnuah kumin January khan ni khatah mi 100 hnuai lamah an tla thla hman tawh a ni.