Joe Biden-a'n 2022 inthlan tihbuai tumah Russia puh

US president Joe Biden chuan Thawhlehni khan Russia president Vladimir Putin chu kum 2022-a an rama Congressional election neih tur chu thu dik lo vawrh darha tihbuai tumah a puh.

"Kum 2022 inthlan tihbuai tumin Russia chuan thu dik lo a vawrh darh ṭan tawh a ni," tiin Biden chuan Washington-a director of national intelligence office a tlawh ṭumin a sawi. Russia chet dan chu US ram rorelna leh thuneihna palzutna chiang tak a ni, a ti.

Russia president Putin chungchang pawh sawiin, "Buaina lian tak a nei, nuclear ralthuam chiah neihna economy-ah a awm a, a bak engmah neih a nei lo. Buaina lian takah a inbarh lut mek tih a inhriat avang hian kei chuan a hma aia mi hlauhawm zawk niin ka ngai ," tiin a sawi.

US hruaitu hian tunhnaia cyberattack hluar chho mek chu ngaihven ngai tak a nih thu sawi bawkin, "Indona a thlen a, ralthuam nena inkah ngaihna a thlen a nih chuan cyberattack nghawng hi a ngei ang," a ti. US hian tun hnaiah China chu March thlaa Microsoft Exchange hack-tuah puhin a dem thu a lo sawi tawh a, White House chuan Russia chu an ram chhung aṭanga ransomware beihna awm fo titawp turin a lo ngen tawh bawk.

United States hian kum 2022 hian midterm election a nei dawn a, House of Representatives seat zawng zawng leh Senate seat hmun thuma ṭhena hmun khatah inthlan hi neih a ni dawn.