Sydney khawpuiah kar li chhung lockdown pawtsei

Australia-a New South Wales state khawpui, Sydney-ah hri kai an pun zel avangin kar li chhung lockdown pawhsei a ni a, August 28 thleng khawpui leh a ṭhenawm regional centre huam chhunga chengte chu pawn chhuah khapsak an ni leh.

Sydney khawpui leh a chhehvelah hian June thla aṭang khan Delta variant vangin hri kai hi an pung chho leh a, hei vang hian lockdown hi puan a lo ni tawh a ni. Lockdown hman mek hi ni thum hnuah a tawp dawn a, mahse thunei­tute chuan August 28 thleng an pawtsei leh ta a ni.

Mi maktaduai nga chenna, Sydney khawpui­ah Thawhlehni khan hri kai 177 hmuh thar niin, Thawhṭanni khan hri kai thar 172 an awm bawk. Hri kai hmuh thar zingah mi 46-te hi hriatchhuah an nih hmain punkhawmna hmunahte an tel avangin hri hi an thehdarh a rinawm niin thuneitute chuan an sawi. Khuahkhirhna dante thlahdul a nih hmain khawtlanga hri inkaidarhna chu tihtawp pawh a ngai a ni, an ti.

New South Wales state premier Gladys Berejiklian chuan lockdown an hman chhunga hri leng an thunun thei lo leh hri kai thar a tlahniam lo chu pawi a tih thu sawiin, mipuiten social distancing rule an zawm theihna turin police pawh tam zawk duty tir an ni dawn tih a sawi a, mipuite chu dan bawhchhiate report zel turin a chah bawk.

Hetih lai hian lockdown pawhsei a nih avangin sorkar lam sawiselna a ri nasa hle a, sokarin hri leng chungchanga kaihhruaina a thlak danglam fo avang leh, vaccine pek chhuah an kalpui chak tawk loh avangin mipui ngaihdan lak hnuhnung berah prime minister Scott Morrison kaihhruai sorkar thlawptu pawh an tlahniam hle.

Mahse PM Morrison chuan Delta variant chung chang chu sawi lawk theih a ni loh vangin an hma lak dan chungchangah sawiselna pawh a tam dawn tih an hriat thu a sawi thung.