Kenya school-a innek-buainaah naupang 14 thi

Kenya khawpui Nai­robi thlang lama awm, Ka­kamega Primary School-ah thil hlauh vanga zirlai naupang innekbuaina thlengah naupang 14 an thi a, midang 39-in hliam a tuar tih Kenya Red Cross chuan a tarlang.

Naupangte innek­buaina avang hian step a chim a, step chim vang hian naupangte hi an thihphah nia sawi a ni. Naupang thi leh hliamte hi kum 10-12 inkar nia sawi a ni a, an innekbuaina chhan tak hi hriat chian a ni lo. 

Zirlai pakhat nu chuan he thil thlengah hian an zirtirtute a puh a, chhiatna thlen chhan hi zirtitute'n naupang an hrem vanga zirlai naupangte hlaua an tlanchhiat vang a ni, a ti. School chhuahsan tuma naupang innekbuainaah hian school building chhawng 3 aṭanga nau­pang an tlak thute pawh tarlan a ni. 

He chhiat tawhna chung­changah hian Ken­ya education minister George Magoha chuan thuchhuah siam nghalin, thi leh hliamte a tawrhpui thu leh he thil thleng hi pawi a tih tak zet thu a tarlang. Nikum September thla khan Nairobi-ah classroom chim vangin zirlai naupang 8 an thih bakah, 69-in hliam an tuar bawk.