Khawvelah hri kai an pung thar leh Ram 132-ah Delta variant darh tawh : WHO

Khawvel huapin kar liam ta (July 19-25) khan Covid-19 kai thar maktaduai 3.8 an awm belh a, hri kai thar hi a kar hmasa aiin 8% in an pung tih UN health agency chuan Nilaini khan a puang.

World Health Organization (WHO) data thar berin a tarlan danin, America-ah 25% lehWestern Pacific-ah 30% in hri kai an pung a ni.

Kar liam ta khan khawvelah chawhrualin nitin hri kai thar 5,40,000 an awm ziah ang a ni a, a kar hmasa leh zawkah erawh chuan nitin 4,90,000 hri kai thar awm ang an ni thung a, hri kai hi an pun belh zel a ni.

Khawvel pumah kar liam ta khan Covid-19 vanga thi 69,000 an awm a, a hma kar aiin thi zat hi 21% in an pung bawk.

WHO chuan ni sarih liam ta chhungin United States-ah hri kai thar an tam ber tih sawiin, hri kai thar mi 5,00,000 chuang hmuhbelh niin, an punna zat hi 131% zet a tling pha a ni. Hemi hun chhung vek hian Brazil-ah hri kai thar 3,24,334, Indonesia - 2,89,029, United Kingdom-ah 2,82,920 leh India-ah 2,65,836 ten an dawt a ni.

"Kar hmasa chhung khan Covid-19 kai 6.5% in an pung a, hri vanga thi 20.6% in an pung, kar hmasa khan mi 69,000 an thi a ni. He thil hi a pawi hle a, hri vanga thihna thleng tam tak hi chu kan veng thei a ni," tiin WHO Covid-19 Technical Lead, Maria Van Kerkhove chuan a sawi.

WHO in "variant of concern"-ah a lo sawi tawh, Covid hri chi hrang zingah Alpha variant chu ram 182-ah a darh tawh a, Beta chu ram 131, Gamma ram 81 leh kar hmasa chhunga ram pariata hmuhchhuah thar nen Delta variant chu ram 132-ah a darh tawh bawk.