New York-ah Covid-19 vaccine la te $100 pe zel dawn
United States-a Covid-19 delta variant darh zel tur venna kawng khat atan New York City thuneitute chuan New York-a cheng vaccine la te hnenah US dollar 100 zel pek an tiam.
New York mayor Bill de Blasio chuan vawiin aṭang hian khawpui chhunga vaccination centre-a vaccine late hnenah $100 an pek zel tur thu hi a sawi a ni.
"Vaccine semchhuah hi thil pawimawh ber a ni. Covid vanga thil thleng tam tak sawi tur kan nei ṭheuh ang a, mahse vaccine kan pekchhuah leh si loh chuan buaina chinfel dan kawng kan zawng lo tihna a ni", tiin mipuite chu hlim taka hringnun chen zel an la duh chuan vaccine la vek turin a chah a ni.
Hemi hma hian Mayor chuan khawpui chhunga hnathawk zawng zawngte chu September thla laihawlah Covid-19 vaccine an lak hman vek loh chuan kartin test an hmachhawn a ngai tawh dawn tih a lo puang tawh bawk.
De Blasio hian khawpui chhungah vaccine dose maktaduai 9.9 chuang semchhuah a nih tawh thu a sawi. New York-a cheng puitling zinga 66% chuan dose kima an lak tawh laiin, 71% in dose khatna an la tawh tih New York City health department chuan a sawi.
Thawhlehni khan Centers for Disease Control and Prevention chuan khuahkhirhna thar an tichhuak leh a, US-a Delta variant darh zel tur ven nan mipui pawnchhuak turte chu hmun ṭhenkhatah face mask vuah a la ngaih thu sawiin, vaccine dose la kim tawhte pawh Covid-19 hri inkaichhawn tamna bialah chuan inchhungah pawh mask hi vuah turin a ngen.
US-ah hian Delta variant vangin hri kai thar nasa takin an pung chho leh tawh a, public health expert-te chuan hri leng hi a hlauhthawnawm chho leh niin an ngai.