Israel-in kum 60 chunglam tan vaccine dose thumna pe dawn

Israel chuan kum 60 chunglam tan Covid-19 vaccine dose thumna a pe dawn tih prime minister Naftali Bennett chuan Ningani khan a sawi.

"Complementary vaccination campaign" a kalpui mekna peng pakhatah booster dose hi naktuk, Pathianni aṭangin a pe chhuak ṭan dawn a ni. Booster dose hi kum 60 chin, thla nga liam taa vaccine dose kima lo tawhten an la thei dawn a ni. Israel hi khawvela vaccine dose thumna pe thei hmasa berte zinga mi an ni.

Prime Minister Benett chuan, "Vaccine dose la kim tawh, kum upa zawkte chu he additional dose la vek tur hian ka sawm che u a ni," tiin mipuite chu hri laka invengṭha turin a chah nghal bawk.

Bennet chuan booster vaccine hi Israel President Isaac Herzog chuan a la hmasa ber dawn tih a sawi bawk a ni.

Israel hian nikum December thla chawhnu lam aṭang khan vaccination campaign hi a kalpui ṭan a, an ram mipui maktaduai kua zinga 55% chuan dose hnih an la tawh a ni.

Hri kai thar pawh an tlahniam chak hle a, hei vang hian June thla tir lam khan sorkar chuan hri leng vanga khauhkhirhna a siam zinga eng emaw zat chu a lo thlahdul tawh a ni. Mahse tun hnaiah hri kai an pung chho leh a, hei vang hian health ministry chuan vantlang hmun, midang nena inhnaihchilh theihna hmunah chuan face mask vuah turin thupek a tichhuak thar leh a ni.

Health minister Nitzan Horowitz chuan vaccine dose thumna an pek leh tur hi a pawimawh thu sawiin, "Dose thumna hian nunna a chhanhim thei dawn a ni," a ti.