Japan-in state of emergency pawtsei dawn

Japan sorkar chuan Covid-19 hri kai thar pung zel vangin nimin khan Olympic Games neih mekna, Tokyo-a bial pathum leh khawthlang lama Osaka-ah August 31 thleng state of emergency a pawtsei.

Tokyo-ah hian state of emergency ṭum li an puanna a ni a, chhim lama Okinawa thliarkarah pawh August 31 thleng emergency hi pawhsei a ni bawk.

Hri leng buaipuina pawla an hotu, economy minister Yasutoshi Nishi­mura chuan emergency pawhsei an rawt thu hi sawiin, expert-ten an pawm hnuah prime minister Yoshihide Suga chuan a puang a ni.

Japan hian hma a lak chak avangin Covid-19 darh nasa tur hi an lo pumpelh thei tawh a, mahse tunah hian inkaidarh awlsam tak Delta variant darh chu thunun tumin hma a la leh mek a ni. Nitin hri kai thar hi an pung chho a, Ningani khan a ṭum khatna atan ni khata hri kai thar 10,000 chuang an awm.

State of emergency pawh puan ni fo tawh mah se khuahkhirhna an siamte hi tihluihna a awm hran lo a, ram dang angin lockdown khirh tak an la puang ve ngai lo. Mahse health minsiter Norihisa Tamura chuan an ramin hun hlauhawm tak a thleng chho mek tih sawiin, mipui pawn chhuak chu tam belh lo mah se mahse hri kai thar an pung chaka, hei hian Delta variant darh chakzia a tichiang a ni, a ti.

Tokyo-ah Ningani khan hri kai thar 3,865 an awm a, a hma niin 3,177 an awm thung. Hri kai thar pung chho avang hian damdawi lama enkawltute an mangang tawh hle a, Nilaini khan Tokyo-a damdawi-in khum awm zinga 64% te chu Covid-19 kai damlo na zualten an luah khat tawh a ni.

Prime minister Suga leh Olympics huai­hawhtute chuan Summer Games leh tun hnaia hri kai pung hian inkungkaihna an neih loh thu an sawi. Tokyo-a Olympic village-a infiammni leh coach zinga 80% chuangin vaccine an la tawh a, test neih tir vek an nih bakah an chetvelnaah pawh khuahkhirhna siam a ni bawk. Olympic bubble huam chhunga infiammi awm leh hmun dang aṭanga kalte chu hri darh tur venna atana khuahkhirhna dan siamte zawm vek tura tih an ni a, intihsiakna hmun tam zawkah chuan entu kal khap a ni bawk.

Organiserr-te chuan nimin khan Games kaihhnawiha mi 27 te chuan Covid-19 an kai tih hmuhchhuah a nih thu sawiin, an zingah hian athlete pathum an tel. July 1 aṭang khan Games nena inkaihnawihna nei mi 220 chu hri an kai tih hmuhchhuah a ni tawh.