Myanmar sipai hotuin inthlan buatsaih ngei a tiam

Myanmar sipai sorkara an hotu lu ber, general Min Aung Hlaing chuan an ramah multi-party election buatsaih ngei a tiam. A kaihhruai sorkar chuan Association of Southeast Asian Nations (ASEAN)-in special envoy tura a ruat pawh ṭha taka thawhpui a inpei thu a sawi bawk.

Sipaiten civil sorkar thuneihna an hnehchhuh aṭanga thla ruk hnuah, Min Aung Hlaing hian nimin khan TV-ah thu a sawi a, "Myanmar chu ASEAN thawhpui turin a inpeih tawh a, Myanmar-a ASEAN special envoy pawh inbiakna neihpui a inhuam a ni," a ti.

Vawiin hian ASEAN foreign minister-te hi an inhmukhawm dawn a, Myanmar rama tualchhunga buaina leh tharum thawhna thlengte tihtawp a nih theihna atan leh, sipai sorkar leh a eptuten inbiakna an neih theihna tura hma la turin special envoy ruat an tum a ni.

Min Aung Hliang chuan democracy tundin leh a ni ngei dawn tih a sawi a, mahse hun tiam erawh a sawilang lo. State of emergency puan pawh August, 2023-ah hlih a ni ang, a ti.

Kumin February 1 khan sipaite hian Aung San Suu Kyi kaihhruai civil sorkar thuneihna hnehchhuhin, Suu Kyi-i leh hruaitu ṭhenkhatte an hreng zui a ni. Sipaite chuan hei hi nikuma an ram inthlanpuia Suu Kyi-i party, National League for Democracy (NLD) chak danah thil dik tawk lo a awm vang niin an sawi.

Civil sorkar paihthlak a nih hnu hian ram chhung hmun hrang hranga sipai thuneihna duh lohna lantirin nawrh huaihawt a ni a, buainate chhuakin mi tam takin nunna an chan tawh a ni. Nimin thleng khan hmun ṭhenkhatah chuan sipai sorkar duh lohna lantirin nawrh huaihawt chhunzawm a la ni . Tualchhung buaina thleng vang hian public leh private sector pawh hna thawk mumal theih loin a nghawng a, ramri lamah helpawl leh sipaite inkahna pawh a hluar chho leh bawk a ni.

Sipai thuneitute chuan sipai rorelna dodaltute chu firfiakah an puang a ni. Min Aung Hlaing chuan, "Tunah chuan firfiak ṭhenkhatte pawikhawihna thlen ṭhin tih loh chu, ram pum huap chuan boruak pawh a ṭha chho tawh a ni," a ti.

Activist group, Assistance Association for Political Prisoner chuan civil sorkar paihthlak a nih aṭanga tualchhung buaina chhuakah, sipai kut turin mi 939 an thi tawh niin a sawi a, mi 6,990 vel man an ni tawh bawk niin a sawi. Mahse sipai lam chuan thi zat an tarlan hi a takah chuan a tlem hle zawk niin a sawi thung a, buaina chhuakah hian sipai pawh eng emaw zat an thi tel a ni, tiin a sawi.