Turkey-ah ram kangin chenna in tam tak tichhia

Turkey ramah ni eng emaw chen chu ram nasa takin a kang tawh a, ram kang hian ram ngaw a kan chhiat bakah, mihring chenna in tam tak a tichhe tawh bawk.

Nilaili liam ta khan chhim lam province - Mersin, Osmaniye, Adana, Antalya leh Kahramanmara-ah ram hi an kang ṭan a, a hnuah chhim thlang lam Mugla province leh central province - Kirikkale leh Kayseri-ah a kang ve leh a ni. Province hrang hrangah hian ram hi hmun 98-ah an kang a, heng zingah 88 chu an thunun thei tawh niin minister of agriculture and forestry Bekir Pakdermilri chuan a sawi.

Pakdermirli chuan ram kang hi kangṭhelhtu 4,000-te bakah thlawhtheihna paruk, unmaned aerial pakua, ummanned helicopter pakhat, helicopter 45, heavy duty vehicle 55 leh water tender 1,080 hmanga ṭhelh a nih thu a sawi. Hriat theih chinah kangmei chhuakah hian mi paruk an thi tawh a, mi tam tak chu hmun him lamah sawnchhuah an ni tawh bawk, a ti. Thi zingah hian forest worker pahnih an tel.

President Recep Tayyip Erdogan chuan Inrinni khan ram kanna hmun ṭhenkhat chu thlawhin, helicopter-in a kan chhiat dante a en kual a ni. President chuan kangmei chhuakin an chenna in a tichhiatte chu sorkarin a sak ṭhat sak dawn tih a sawi a, kangmei chhuakin harsatna a thlenna biala chengte tan tax, social security leh credit payment tihhun pawh sawn hlat a ni a, sumdawngte chu sorkarin a pung awm loin sum a puk tir dawn tih a sawi bawk.