Israel leh Sudan-in thawhdun dan tur sawi
Israel Prime Minister Office (PMO) chuan Thawhṭanni khan an ram prime minister Benjamin Netanyahu leh Sovereignty Council of Sudan Chairman Abdel Fattah al-Burhan-a'n ram pahnihte thawhdunna tur inremna siam chungchang an sawi dun tih a tarlang.
Thawhṭanni khan Israel PM Netanyahu hi Uganda-ah a zin tih Israel PMO chuan a tarlang a, a zin pah hian Sudan Sovereignty Council Chairman Burhan chu a hmu nghal a ni. Ram hruaitu pahnihte inhmuh chhan hi hun rei tak tawh ram pahnihte inkara innghirnghona awm ṭhin chinfel dan tur chungchangah a ni a, kum 1948 hnua ram pahnihte'n inrem tura thu an sawi dun leh hmasak berna a ni. Israel PM Netanyahu leh Sudan Sovereignty Council Chairman Burhan hi darkar hnih chuang zet an inkawm a, Uganda President Yoweri Museveni chenna in Entebbe-ah ram hruaitu pahnihte hi an inhmu a ni.
Ram pahnihte inhmuh chungchang hi Palestinian Authority (PA) chief negotiator Saeb Erekat chuan sawiselin, Israel hian Sudan ram hi sipai chakna lama thawhpui a duh vangin, inrem turin a sawm niin a sawi. Palestine ram eptu atana lam ṭangah a sawm niin Erekat chuan Israel hi a puh bawk.
Israel PMO chuan ram pahnihte inhmuh dun theih chhan hi US Secretary of State Mike Pompeo remruatna vang niin a sawi. Ram pahnih hruaitute inhmuh zawh hian Netanyahu chuan Sudan nena an inkarah a ṭha zawnga thil an kalpui chhoh dawn thu a sawi a ni.
Pathianni khan Pompeo chuan Burhan chu phone call hmangin Washington tlawh tura a sawm thu tarlan a ni bawk. Burhan hian US a tlawh chuan Sudan ram hruaitute zinga kum 30 hnua US-a zin hmasa ber tur a ni bawk ang.