Germany-in September aṭangin Booster dose pe chhuak dawn

Germany rama Covid-19 Delta variant darh mek karah sorkar chuan kumin September thla aṭang hian Covid booster shot anpechhuak ṭan dawn a, naupang kum 12-17 inkarte tan pawh awlsam zawkin vaccine an dawn phah thei dawn a ni.

Health Minister Jens Spahn leh regional peers 16-te chuan Thawhṭanni khan kum upa leh natna benvawn neite chuan booster shot pek hi an rel a, mi ṭhenkhat chu an taksa in natna a do theihna a tlahniam chak avangin ngaihven ngai tak a ni tih an sawi bawk.

Mobile vaccination team-te chu care leh nursing home hrang hrangah kal tirin, heng hmuna awmte chu eng vaccine pawh lo la tawh mah se Pfizer/BioNTech emaw Moderna emaw booster shot an pe dawn tih ministry chuan a sawi. Doctor-te chuan booster shot hi natna kai awlsam leh mamawha an hriatte hnenah an pe chhuak thei dawn bawk a ni.

AstraZeneca dose hnih emaw, single-dose Johnson & Johnson vaccine emaw la tawh ten invenna turin booster shot hi an la thei bawk tih health ministry chuan a sawi.

AstraZeneca leh Johnson & Johnson vaccine-te hi viral vector vaccine an ni a, hetihlai hian Pfizer and Moderna vaccine-te chuan novel mRNA technology an hmang thung a ni.

Minister-te hian kum 12 chunglam mi tam zawkte'n vaccine an lak theih dan tur ruhamnna siam pawh an remti a, an rama vaccine regulator STIKO-in ruahmanna a lo siam tawhte chu pawhfan an tum. STIKO hian kum 12-17 inkarte chu natna benvawn an nei emaw, Covid high risk group zinga mi nen an chenho chauhin vaccine la turin a lo ti a ni. Heng zinga tel lo tleirawlte chuan nu leh pa leh doctor-te remtihna chuahin vaccine an lak phalsak an ni.

Mahse health minister chuan Thawhṭanni khan tleirawl a tam thei ang berin vaccine an lak theih nan ramchhunga vaccination centre te chu kum 12-17 inkar tana pe chhuak vek turin a ngen a, clinic-ah pawh kalphung pangngai anga pe chhuak zel turin a ti a ni.

Minister hian dose lak chu mahni duhthlannaa innghat ni mah se naupang leh tleirawl te'n nipui chawlh an hman zawha himdam taka classroom-a an let leh theihna tura ti an nih thu a sawi.

Germany hian a ram ṭhenawmte aiin hri kai nei tlem rih hle mah se hri inkaidarh awlsam Delta variant vangin kar liam ta aṭang khan hri kai hmuhchhuah hi an pung chho leh ṭan tawh a ni.Ramchhunga vaccine pekchhuah a tlakhniam vangin hlauhthawnna a lian chho leh tawh hle a,vaccine dose kima la hi 52% vel chauh an la ni.

European Union huamchhungah Pfizer/BioNTech leh Moderna siam vaccine-te chu naupang kum 12 chunglam tana hman turin European Medicines Agency chuan a pawmpui tawh.