US-in Myanmar sipaite na zawka nawr turin a duh

Myanmar sipai sorkarin an ram inthlanpui chu kum hnih hnuah neih tuma a ruahman chu US chuan sawiselin, sipai hotute chu hun tikhawtlai zel tumah puhin Southeast Asian ramte chuan na zawka an nawr a ngai tih a sawi.

US State department official chuan, "Sipaite hian hun tikhawtlai zel a, an kuta thuneihna rei thei anga dah an tum a ni," a ti . Hei vang hian ASEAN ramte chuan Myanmar sipaite nena hmalakna tur inremna an lo siam tawh chu kengkawh tura na taka a nawr a ngaih thu a sawi.

Kumin April thla khan ASEAN special summit-ah Myanmar tualchhung buaina thleng mek tihreh a nih theihna tura point panga-ah Myanmar sipai hotute nen inremna siamin, heng zingah hian tharum thawhna thlengte tihtawp leh, sipai leh eptu lamten inbiakna an neih theihna tura hma latu tur special envoy ruatte a tel.

Sipaiten thuneihna an lak hnuah tualchhung buaina hi a thleng reng a, nimin thleng khan buaina a la chhuak a ni. Hetih lai hian sipai hotu lu ber, General Min Aung Hlaing chuan sipaiten thuneihna an chan hnua state of emergency an puan chu kum 2023, August thleng hman chhunzawm a la ni dawn tih a sawi avangin, an ram inthlanpui neih hun tur pawh a hmaa an lo tiam tawh aiin kum khatin sawn hlat a ngai leh dawn a ni.

ASEAN hian Myanmar-a special envoy tur hi a la ruat fel lo a, Brunei second foreign minister Erywan Yusof chu ruat an duh a, mahse Myanmar sipai lam pawmpuina an la nghak mek nia sawi a ni.

Tualchhung buaina thleng mek karah Myanmar-ah hian Covid-19 hri leng a hluar chho mek a, nimin khan hripui vanga thi mi 330 awm belhin, Covid-19 hri kaihhnawiha thi hi mi 10,000 an chuang tawh. Hetih lai hian hri vanga thi zat dik tak hi official-a a tarlan aiin an tam zawk hle rin a ni thung.

Health ministry chuan hripui kai hmuh chhuah tawh hi mi 3,06,354 awm tawhin, heng zinga 10,061 hian an thihpui tawh niin nimin khan a tarlang. Thawhṭanni khan sample 12,394 endik niin, heng zinga 3,689 chuan hri an kai tih hriatchhuah a ni a, hri kai hmuh chhuah zat hi 30% dawn a tling. Hri kai an pun chak avangin oxygen indaih lohna pawh a thleng mek niin doctor-te chuan an sawi a, hetihlai hian sipai lam chuan supply lamah indaih lohna a awm loh thu an sawi thung.