Wuhan khawpuia chengte Covid test neihsak leh vek dawn

Covid-19 hri chhuah ṭanna nia sawi, China-a Wuhan khawpuiah kum khat chuang hnuah tualchhunga hri kai hmuh chhuah an awm leh avangin, thuneitute chuan khawpuia chengte chu Covid-19 test neihsak leh vek an ni dawn tih an puang.

Mi maktaduai 11 chenna, Wuhan-ah hian kum khat chuang hri leng hi an thunun tawh hnuah, Thawhṭanni khan migrant worker pasarihin hri an kai tih hmuh chhuah leh a ni. Hei vang hian hri darh zel tur venna atan khawpuia chengte hi test neihsak leh vek an ni dawn.

China ram pumah Thawh­ṭanni khan hri kai thar mi 90 an awm a, Pathianni khan mi 98 an awm bawk. Thawhṭannia hri kai hmuh thar zinga 61 hi tualchhung aṭanga kai an ni. Ni 10 liam ta chhung khan hri kai thar 400 chuang an awm a ni. Hri kai hmuh thar an pun chhoh leh avangin China chuan khawpui lian hrang hrangah pawn chhuah khapna te a siam leh a, ram chhunga inzinpawh pawh khapin, mass testing-te a neih chho leh a ni.

Myanmar nena inri, Yunnan province chuan July thla khan Delta variant hmuh a nih thu a lo sawi tawh a, ni 10 chhung khan province dang 16-ah pawh he variant hi hmuh a ni tawh nia sawi a ni bawk.

National Health Commission-in a tarlan danin, Thawhṭanni thleng khan mainland China-ah hri kai hmuh chhuah tawh chu mi 93,193 niin, hripui vanga thi hi mi 4,636 an awm tawh a ni.