Afghanistan mite khawpui chhuahsan turin hriattir

Afghanistan sipai leh Taliban firfiakte inbeihnaah Helmand province khawpui, Laskhar Gah-ah civil mi 40 an thi. Afghanistan sipaite chuan he khawpuia chengte chu an theih anga rang a khawpui chhuahsan turin a hriattir.

Afghanistan aṭanga US leh NATO sipaite lakchhuah an nih hnuah Taliban firfiakte an ram chhung hmun hrang hrangah an che hluar chho leh hle a, thingtlang hmun tam zawk chu an thununna hnuaiah an dah tawh a ni. Thingtlang lam aṭangin province khawpuite lak tumin hma an la chho leh mek a ni.

215 Maiwand Afghan Army Corps commander General Sami Sadat chuan mi nuai hnih vel chenna, Laskhar Gah khawpuiah Taliban firfiakte laka beihpui an thlak theihna turin khawpuia chengte chu a theih anga ranga hmun dang pan turin a ti. "In chenna chhuahsan chu thil harsa tak a ni dawn tih ka hria, kan tan pawn thil harsa a ni, mahse ni rei lo vak lo in awmsawn a ngaih pawhin min lo hrethiam rih rawh u" tiin "Taliban-te chu an awmna hmun apiangah kan bei dawn. Theihtawpin kan bei zel dawn a, Taliban firfiak nunna pakhat pawh kan zuah lo ang," a ti.

Thuneitute chuan firfiak pawl hian khawpui chhunga radio leh TV station eng emaw zat an la tawh tih sawiin, Taliban thlawptu channel, Islam programme chhuah ṭhin chauh chu hnathawh an phalsak a ni.

Taliban-te hian Afghanistan ram thunun tumin hma an la zel a, chhim lama an chakna hmun thin, Kandahar pawh lak leh tumin an bei mek a, khawtlang lama Herat khawpuiah pawh sipaite nen an inbei ngawrh leh hle tawh bawk.

Defence minister chenna in bei
Taliban firfiakte chuan Thawhlehni zan khan Kabul-a acting defence minister Hsimillah Khan Mohammadi chenna in an bei. He pawikhawihna thlen lai hian minister hi inah hian a awm lo a ni.

Official-te chuan minister chenna in beitute hi firfiak pali niin, security force-ten bei letin, darkar nga vel an inkah hnuah firfiakte hian an kaphlum vek a ni tih interior ministry thupuangtu Mirwais Stanekzai chuan a sawi. Minister chhungte pawh hmun him lamah hruai nghal an nih thu a sawi bawk.

Nimin khan Taliban thupuangtu Zabihullah Mujahid chuan pawikhawihna hi an pawl tih a nih thu sawiin, Afghan sipaiten province hrang hranga an pawl laka beihpui an thlak avanga phuba an lakna a ni tih sawiin, sipaite beihpui thlakna avang hian civil mi tam tak an thih bakah, hmun danga tlanchhiat ngaite an awm a ni, a ti.