Nigeria school naupangte tlan chhuahna tur sum phut

Nigeria-a school naupang 80 bawr vel rutute chuan naupang tlan chhuahna atan pakhatah naira maktaduai khat zel an phut tih an sawi.

Heng zirlai naupangte hi thla liamta khan Nigeria hmarlam, Kaduna khuaa Bethel Baptist High School aṭanga rukbo an ni a, nikum December hnua Nigeria hmarthlang lam biala school naupang a ruala rukbo an nih ṭum 10-na a ni.

Naupang rukbote chhuah an nih theihna atan Reverend Ite Joseph Hayab chuan palai hna a thawk a ni.

Rukbo an nih aṭanga a ni hnihnaah an zinga 28 chu chhuah a ni a, July thla khan mi dang 28 chhuah an ni leh tawh. Mahse mi 81-te chu rubotute hian an la hreng a ni.

Nigeria thuneitute chuan suamhmangte hian tlanna sum duh vangin inrukbona a thleng ṭhin niin an sawi.

Nigeria hmarlama school te hi suamhmangte hian an bitum fo a, hetianga zirlai naupang a ruala rukbo ṭhin hi Boko Haram chuan an chingchhuak hmasa ber a, a hnuah Islamic State West Africa Province-ten chingin, cirminal gang hrang hrangte'n an ching chho ve leh vek a ni.