Malayasia PM-in bang tura phutna a hnawl

Malaysia prime minister Muhyiddin Yassin chuan eptuten PM a nihna aṭanga bang tura an phutna chu hnawlin, thlawptu a la ngah tawk tih a sawi.

PM Muhyiddin chuan September thlaa Parliament session neih hunah, thlawptu a ngah leh ngah loh hi vote a la dawn tih a sawi a, hei hi an ram lal pawhin a remtihpui tih a sawi.

"Kan lal hnenah pawh Parliament member ṭhahnem takin min thlawp thu min hrilhna ka dawng tih pawh ka hrilh a, member tam zawkin min thlawp tih pawh ka chiang hle a ni," tiin TV-ah a sawi.

Kar liam ta khan King Al-Sultan Abdullah chuan PM Muhyiddin kaihhruai sorkarin a pawmpuina la loa emergency law puan a tihtawp chungchanga sorkar a sawiselna a lo tichhuak tawh a ni.

Muhyiddin kaihhruai ṭangrual sorkara pawl lian ber, United Malays National Organisation (UMNO) chuan nimin khan PM an thlawpna hi an hnuhdawk a, sorkar siam turin thlawptu a ngah tawk tawh lo tih an sawi. Ṭangruala sorkar a thawhpui ṭhenkhat chuan Muhyiddin hi phatsantuah an puh a, hetihlai hian an ram lal thupek a ngaih pawimawh loh avangin PM a nihna aṭanga bang turin an phut bawk.

Eptute chuan House-a PM-in thlawptu a ngah tawk leh tawk loh fiahna atan thla khat la nghah chu thil ṭul lo tak a ni tih sawiin, hemi chhung hian lawmaker ṭhenkhat chu lei theihin an awm dawn a, hei bakah an ram economy pawhin a tuar zel a ni, an ti. Hei vang hian Parliament emergency session neih a, PM fiahna neih vat an phut a ni. "PM chuan thlawptu a ngah tawk nia a sawi chuan, Parliament-ah a dik ngei em tih a lantir a ngai a ni," tiin Muhyiddin kaihhruai sorkar chu a hlawhchham a ni, an ti.