SKorea-in vaccine siamna atan USD tld 2 dawn invest tum

South Korea president Moon Jae-in chuan an ram chu kum 2025-ah Covid-19 vaccine siamna hmunpuia siam hman turin, vaccine siamna atan hian won trillion 2.2 (USD tld 1.92) an invest dawn tih a sawi.

Khawvel huapa vaccine indaih lohna leh a thawnchhuah kawnga harsatna awm chungchangte public-pivate committee din tharin an sawihonaah President Moon hian he thu hi a sawi a ni.

President chuan Covid-19 vaccine siam chu an ram hmalakna tur pawimawh zingah telhin, "Kum 2025-ah chuan khawvela vaccine siam chhuaktu lian ram panga zingah kan tel dawn a ni," a ti.

Sum tam tham tak sorkarin a invest hmang hian medical scientist 200, clinical trial professional 10,000, bio production worker 2,000 vel chu kumtin an chhawr thei dawn. Ram pawn lamah pawh thawhpui tam zawk siamin, foreign investment leh company-te pawh hip luh an tum dawn tih Moon chuan a sawi.

SKorea-a vaccine pek chhuah rate hi ram changkang dangte a la pha lo hle thung. An ram mipui maktaduai 52 vel zingah 39.6% chauhin vaccine dose khatna an la a, hetihlai hian Singapore leh Britain bakah ram hausa dang ṭhenkhata chuan vaccine dose khatna pek tawh hi 70% an tling tawh a ni. Korea Disease Contral and Prevention Agency (KDCA) tarlan danin vaccine dose la kim tawh hi 14.4% vel chauh an la ni bawk. Mahse sorkar chuan September thlaah an rama vaccine la thei chin 70% chu dose khatna pek hman a tum tih a sawi.