Iran President thar Ebrahi Raisi lalut

Iran President thar atan hardline cleric Ebrahim Rasi chu nimin khan lakluh a ni.

Kum 60 mi, Raisi hi June thlaa inthlana hnehna a chan hnuah, Thawhlehni khan an ram hotu lu ber, supreme leader Ayatollah Ali Khamenei chuan hruaitu thar atana pawmpuina a pek hnuah nimin khan lakluh a ni ta a ni.

Judge a nih laia human rights palzuta puh a nih avangin US chuan Raisi hi a la hrek mek.

President thar atan lakluh a nih hnuah Raisi chuan US-in an ram a hrekna avanga oil thawnchhuah lamah an tlakhniamna leh international banking system thlenga a nghawng na chu tihtawp a, Iran ram hrekna chu hlih a nih theihna atan theihtawp chhuah a tiam.

Iran hian kum 2015-ah major power ram parukte nena nuclear deal an lo siam tawh chu tuaithar leh tumin hma a la mek a ni. He inremna an siamah hian ram hrang hrangten Iran an hrekna hlihna turin Iran chuan nuclear programme tihtawp a remti a ni. Mahse US President hlui Donald Trump khan he inremna an siam danah hian Iran lakah an nem lutuk nia sawiin US chu a inhnuhdawh pui a, a hranin US sorkar chuan Iran ram hrekna na zawk a siamṭha leh a ni.