China-in ramdang tan Covid-19 vaccine dose tld 2 pek tiam

China president Xi Jinping chuan kumin chhungin China chuan ram dang hnenah Covid-19 vaccine dose tluklehdingawn hnih bakah, WHO hnuaia vaccine semchhuaktu, Covax tan USD maktaduai 100 a pe dawn tih a sawi.

China-a hri inkaichhawn awlsam tak Delta variant pung chho mek karah Xi chuan he thuchhuah hi a siam a ni.

Delta variant hi China hmun ṭhenkhatah hmuhchhuah a ni tawh a, nitina hri kai thar pawh an pung chho leh mek. Hei vang hian mass testing-te an nei leh ṭan a ni.

Ram dang tana vaccine dose tld hnih pek chhuah a tiam hma hian, President Xi chuan APEC head of state emergency online meeting neihah, ram ṭhangmekten Covid-19 hri leng an dona kawnga puihnaturin USD tld thum pek a lo tiam tawh bawk. Heng chhawmdawlna sum hi ram ṭhanglaiin hri vanga khawsak phung leh eibar zawnna kawngah harsatna an tawh meka puihna tur atana tih a ni.

China foreing ministry thupuangtu, Zhao Lijian chuan kar liam ta khan kumin chhungin ram dang hnenah vaccine dose maktaduai 700 chuang an pek tawh thu a lo sawi tawh bawk.

US president Joe Biden pawhin US chuan ramdang tan vaccine dose maktaduai 100 chuang an pek tawh thu a sawi tawh bawk a, August thla tawp lam aṭang hian Washington chuan ram rethei,low-income country 100 hnenah Pfizer dose maktaduai 500 an thawn chhuak dawn tih a sawi bawk a ni.