Philippine khawpuiah lockdown puang

Philippine khawpui, Manila leh a chhehvela province ṭhenkhatah Delta variant darh zel tur venna atan lockdown puan a ni.

Lockdown khauh tak hi Ningani zanlai aṭang khan Manila bakah Laguna province, Iloilo leh Cagayan de Oro khawpuiah te puan a ni bawk a, Cavit leh Rizal khuaah chuan khuahkhirhna siam ni mah se tihkhauh vak a ni lo thung.

Ningani khan sorkarin Covid vaccine la lote chu sum lama chhawmdawlna a pe dawn lo tih thu a thang avangin mi tam tak vaccine lak tumin vaccination centre hrang hrangah an kalkhawm nasa hle a, innekbuaina pawh a thlen phah ṭep nia sawi a ni. Mahse a hnuah sorkar chuan thuthang dik lo a nih thu sawiin, thu dik lo thehdarhtute chu thubuai siamsakah a vau zui bawk.

Mahse kar liam ta khan president Rodrigo Duterte chuan TV-a thu a sawiah, vaccine la lote chu an in chhuahsan phal loh a ṭul tih sawiin, jail-a tan tirah a lo vau hial tawh a ni.

Philippine ram hi Indonesia dawtah Southeast Asia-a hri leng tuar nasa ber a ni. Hri kai hmuh chhuah hi mi maktaduai 1.62 vel awm tawhin, mi 28,000 chuangin an thihpui tawh bawk. Hetih lai hian an ram mipui, maktaduai 110 zinga makaduai 10.3, 9.2% chauhin vaccine dose kim an la la. Sorkar chuan kumin chhungin mi maktaduai 70-te vaccine pek hman a tum a, mahse vaccine pek chhuah hna hi an kalpui chak tawk loh avangin an target hi an phak a rinawm lo thung.

Sorkar chuan lockdown puan chhung pawhin vaccine pek chhuah chhunzawm zel a ni dawn tih a sawi. Ningani bik khan vaccine hi dose 7,10,482 pek chhuah niin, nikhatah an pek chhuah tam ber a ni.