Taliban-ten ni 3 chhungin province khawpui 3 an la

Afghanistan-a Taliban firfiak pawl chuan nimin khan sorkar sipaite kut aṭangin hmarlama Kunduz province khawpui an la leh a, hei hi ni thum chhunga province khawpui pathum an lakna a ni.

Kunduz khawpui an lak hma ni hnihah Nimroz leh Jawzjan province khawpui pawh an lo la tawh bawk a ni.

Taliban leh sipaite hi khawpui chhungah hian an inbei nasa hle a, in leh dawr tam tak pawh hal a ni. Hun eng emaw chen an inkah hnuah firfiakte hian khawpui lian, city centre-ah Taliban flag pawh zar a ni tawh.

Aghanistan aṭanga US leh NATO ṭangrual sipaite an chhuah hnuah Taliban-te hian an thuhnuaia dah tumin ṭan an la chho leh nasa hle a, hmun hrang hrangah sipaite nen an inbei a ni. May thla aṭanga beihpui an thlak hnuah thingtlang lam hmun tam tak an la tawh a, tunah hian khawpui lam lak tumin an bei leh mek. Kandahar leh Helman province khawpuiah pawh kar eng emaw zat chu firfiak leh sipaite hi an inbei tawh.

Zirptawpni liam ta khan chhim thlang lam, Nimroz province khawpui Zarang chu Taliban-te hian lain, darkar 48 hnuah hmarlama Jawzjan provine khawpui Sheberghan chu an la zui leh a ni. Hmarlama khawpui, Sar-e-Pul pawh firfiakte hian ala tawh nia sawi a ni bawk.

Ministry of defence chuan Taliban firfiakte nena an inbeihnaah US chuan a puih thu sawiin, Inrinni zan khan Sheberghan-a Taliban hmun tam tak cu US B-52 bomber hmanga beih a ni, a ti.

Kunduz khawpui hi May thla aṭanga beihpui an thlak hnua Taliban firfiakten an khawpui lak pawimawh ber zingah a tel. Afghanistan khawpui lian ber zinga mi niin, hmarlam province-te nena an inkalpawhna pawimawh a ni bawk. A border hi Afghanistan aṭanga central Asia-a opium leh heroin tawlhluhna kawng atan hman a ni a, hei vang hian firfiakten Kunduz hi an thunun a, ruihhlo tawlhna pawh an thunun tel thei dawn a ni. He khawpui hi kum 2001 hma lama Taliban chakna hmun ṭhin kha a ni a, sipaiten an laksak hnuah kkum 2015 leh 2016 khan an la let leh a, mahse a hnuah sipaite hian an laksak leh a ni.