Greece-ah ni 6 chhung ram kang tawh

Greece rama Evia thliarkarah ni ruk chhung ram kang nasa tak a thleng tawh a, hei vang hian he thliarkara cheng mi sang tel chu hmun him lamah an tlanchhe tawh.

Athens hmarlama ram kang chu thunun a ni tawh a, mahse khawpui chhak lam Evia thliarkara kangmei chhuak erawh a la zual zel a, hmun tam takah kangmei hi a chhuak a ni.

Kar liam ta chhung khan khaw lum lutuk avangin Greece ram hmun hrang hrangah ram a kang a, kum 30 chhunga ram a kan nasat ber ṭum a ni. Thli lum a tleh tel avangin kangmei chhuak hian a kangkai chak hle. Ram ngaw bakah chenna in leh sumdawnna hmun pawh eng emaw zat a kang tawh bawk.

Sorkar chuan kang mei ṭhelh tur hian sipai ṭhahnem tak a tir tawh a, France, Egypt, Switzerland leh Spain pawhin puitu tur tirin, firefighting aircraft-te pawh a tir tawh a ni.

Coastguard-te chuan Evia thliarkar aṭang hian mi 2,000 chuang an thiar chhuak tawh bawk. Central Greece governor, Fanis Spanos chuan thliarkar hmarlam dinhmun chu a la ṭha lo hle tih a sawi.

Ni 10 liam ta chhunga Greece rama kang mei chhuak hian ram hectare 56,000-a zau a kang chhe tawh niin European Forest Fire Information System chuan a tarlang.

Turkey
Turkey ramah pawh ram kang nasa tak thleng mekin, an ram President Recep Tayyip Erdogan chuan an rama ram kang thleng nasat ber ṭum a nih thu a sawi.

Kar khat chuang ram hi a kan hnuah ruah a sur avangin kangmei chhuak pawh hi a ziaawm thei ta deuh niin an sawi. Hmun 200 velah kangmei hi a chhuak a, heng zinga a tam zawk chu thunun theih ni tawhin, hman 12-ah erawh chuan an la thunun hlei thei lo thung. Kangmei chhuak hian Mediterranean leh Aegean province-ah ram zau tak a kangchhe tawh a ni.