Bangkok-ah sorkar laka lungawi lohna lantir

Thailand sorkar chu hri leng dona kawngah an hlawhchham avangin an ram economy thlengin nghawng ṭha lo tak a neih phah nia sawiin, Inrinni liam ta khan mipuiten Bangkok-ah sorkar laka lungawi lohna an lantir.

Sorkarin punkhawm khapna a siam bawhchhiain, lungawi lohna lantirnaah hian mi 1,000 chuang an kalkhawm a, prime minister Prayuth Chan-ocha chu bang tura phutin a office, Government House panin kawng an zawh a ni. Police-te chuan kawngzawhte hi lo dangin, mipui hnawhdarh nan tear gas leh rubber bullet-te an hmang.

Coronavirus darh mek khuahkhirh zo lo leh hma la chak tawh lohah puhin tun hnaiah pawl hrang hrangte chuan sorkar laka lungawi lohna hi an lo lantir fo a ni. Inrinnia nawrh huaihawtte hi Thailand sorkarin Covid vaccinatioin programme a kalpui dan chak tawk loh avanga lungawi lo te an ni bawk.

Thailand sorkar hian AstraZeneca vaccine dose maktaduai 10 lei turin inremna ziahpui tawh mah se, tun thlengin a chanve chiah an la dawng. China hian Sinovac vaccine dose maktaduai ruk chuang a pe bawk a, mahse hei pawh hi a la tawk zo lo a ni.

Inrinni khan Thailand-ah hian Covid-19 kai thar 22,000 dawn an awm leh a, nikhata thi an tam ber ṭum tawngin, hri vangin mi 212 an thi. Ram pumah hri kai hmuh chhuah tawh hi 7,36,522 awmin, thihpui 6,066 an awm tawh bawk.