George Floyd vuiliam a ni

US-a police kut tuara thi, mi hang George Floyd chu Ningani khan Minneapolis-ah vui liam a ni ta. 

George Floyd hi a thih hnua autopsy report tihchhuaha Covid-19 a vei tih hriatchhuah a ni. Mahse a ruang endiktu doctor-te chuan he hri hi a thihna chhan a ni lo tih an sawi nghal bawk. Toxicology report-ah pawh Floyd taksaah hian meth bakah cannabis compound leh morphine hmuh tel a ni bawk. Mahse heng hi a thihna chhan ni loin, police kut a tuar nghawng vanga thi a ni tih sawi a ni. 

George Floyd thihna avanga US khawpui hrang hranga lungawi lohna lantir chu chhunzawm zel a la ni. Civil rights leader Al Sharpton chuan US-a justice sytem thlak danglam vek a nih hma chuan nawrh an huaihawt chhunzawm zel dawn tih a sawi. 

Floyd thih dana lungawi loa nawrh huaihawtte hian khawpui tam takah buaina siamin thil an tichhia a, dawrte pawh an rawk nasa hle. Buaina punlun zel tur vengin khawpui lianahte chuan zan lamah curfew puan a ni a, mahse hetichung hian dan bawhchhiain mi tam tak an pungkhawm chhunzawm reng tho a ni.

White House pawnah pawh nawrh hi  huaihawt a ni tawh a, security force-te chuan pungkhawmte hnawh darh nan hian pepper ball leh smoke bomb an hmang. Nawrh huaihawtte hnawh darh nan hian low-flying chopper-te pawh hman niin an sawi. He thil thleng vang hian US civil rights group chuan President Trump khinna an thehlut a ni. Trump chuan hei hi chhangin, an buaina ber chu ram leh khawpui himna tura thawktu low-flying chopper pilot-te ni loin, an ram tihchhiat duha sorkar thil haltute, pawikhawihtute, thil rawktute leh sorkar chawh buai tumtute chu an ni, a ti.