Brazil-ah Covid-19 vaccine enchin dawn

Brazil sorkar chuan United Kingdom-a University of Oxford-in Covid-19 vaccine an siamchhuah tum mek enchhina chu an rama neih a rem ti. 

Covid-19 hri leng mek dona kawngah a tih damna tur vaccine hmuh chhuah hi a pawimawh hle a, he damdawi hmuhchhuah tumna atana UK ram pawna enchhinna neih hmasak berna tur ram chu Brazil hi a ni, tiin Brazil National Health Surveillance Agency (Anvisa) chuan thuchhuah a siam. 

University of Oxford hian UK-a an laboratory-ah zawng aṭangin enchhinna an lo nei tawh a, he damdawi hmuchhuah tumna atana inpe (volunteer) mi 10,000 an nei bawk a ni. An damdawi siam hi a rintlak em tih hriatchhuah a nih theih nan Brazil-ah hian Covid-19 vaccine enchhinna hi neih a ni dawn ta a ni.   

Brazilian health authorities leh research institution-te chuan University of Oxford hi an lo pui dawn a, volunteer pawh mi eng emaw zat an ruat dawn bawk. Brazil hi US tih loah chuan khawvela hri kai tamna ber ram a ni. Ningani khan Covid-19 vanga thi hi mi 1,437 an awm a, ni khat chhunga thi tam ber ni a ni. Hei vang hian thi tam lamah Italy chu an lehpel tawh a, mi 34,039 an thi tling tawh a ni.

South America-ah hian Covid-19 hri leng hi a hluar chho hle a, mi 46,090 zet an thi tawh. South America-ah hian hri kai mi 10,30,697 an awm tawh bawk.