US-ah Covid hri kai pung thar leh

United States (US)-ah Covid-19 hri kai an pung thar a, tun hnai ni sarih chhung chu hri kai thar hi nitin nuai chuang zel awm anga chhinchhiah a ni.

Health official-te chuan nikum thlasik laia hri kai an pun chhoh ang kha an hmachhawn leh dawn nia sawiin, mipuite chu Delta variant inkaichhawn awlsam tak laka invennan vaccine a rang lama la turin an ngen. Hri kai hmuh chhuah thar zinga 83% te chu Delta variant kai an ni.

US Centers for Disease Control and Prevention (CDC) data tarlan danin ramchhunga puitling zinga 70.6% te chuan vaccine dose khatna an la tawh a, hetihlai hian 60.9% chuan dose bikimin an la tawh thung.

Hetih lai hian mi maktaduai tel chu vaccine la lo an la awm a, vaccine la lo tamna a bikin Florida leh Texas state-ahte hri kai thar hi an punbelh leh a ni.

"Vaccine hi kan pek chhuah ṭhat loh chuan January thlaa hri kai pung thar leh ang khan mi sing telin ni khatah hri hi an kai leh dawn a ni," tiin CDC Director Rochelle Walensky chuan a sawi.

US-ah hian nikum November thla khan ni khatah hri kai 1,00,000 te tling chhoin kumin January thla tir lama a peak a thlen khan ni khatah hri kai 2,50,000 te an awm. June thla khan hri kai hi tlahniamin, nitin 11,000 vel hmuhchhuah awm ang an ni a, mahse kar ruk hnuah 1,07,143-ah an sang chho leh tawh a ni.

Hri kai vanga damdawi-in panpui ngai leh thihpui pawh an pung chho chak leh hle a, mahse ramchhunga mi ṭhahnem takin vaccine an lak tawh avangin kumtira hri leng ai kha chuan a la nep deuh niin an sawi. Hri kai enkawl lai na zual zinga 97% dawn chu vaccine la lo an nih thu White House Covid-19 Response Team chuan a sawi.

Health official-te chuan vaccine la tawh te pawhin hri an la kai thei tih sawi mah se vaccine la ve lo te ai chuan an tawrhdan a nep hle thung tih an sawi a ni. Tun hnaia hri a darh chhoh leh avangain state ṭhenkhat governor, ahmaa vaccine lak thlawp lote pawhin an rilru an thlak leh mek.

Hetih lai hian mask hman chung­changah chuan an ngaihdan a la in ang lo hle thung.Chhimlam state te chuan mask vuah hi an dodal a, mahse state ṭhenkhat a bikin khawchhak lamte chuan mask vuah turin thupek an tihchhuak leh thung.

America mipui 44,000 chuang chu Covid-19 vangin damdawi-inah enkawl mek an ni tih CDC chuan a sawi. Kar khat chhungin damdawi-ina enkawl ngai hi 30% in an pung hman a, June thlaa damdawi-ina awm aiin a let li in an pung tawh bawk. January khan damdawi-ina dah ngai 1,20,000 chuang an awm a ni.

Health official te chuan hun eng emaw chen aṭang khan an ramah hri kai an pung thar leh tih an sawi tawh a, a bikin vaccine semchhuah tlemna state-ahte hri kai an pun chak thu an sawi.