China ram pawnah darkar 24 chhungin Covid-19 kai mi 10,955 an awm : WHO
World Health Organization (WHO) chuan China ram pawnah darkar 24 chhungin Covid 19 kai mi 10,955 an awm hman thu Pathianni khan a tarlang.
Khawvel pumah Pathianni thleng khan he hri kai hi mi 153,517 an awm tawh tih WHO chuan a tarlang bawk. Darkar 24 chhung vek khan China tih loa hmun dangah mi 333 chu he hri vang hian an thi. China ram chhiar tel loin ram hrang hrangah he hri vanga thi hi mi 2,531 an awm tling tawh a ni.
Covid-19 hri hi ram 144-ah a darh tawh thu WHO chuan a tarlang. China tih loah chuan Europe ram hi he hri tuar nasa ber an ni a, Europe-ah hian he hri kai hi mi 40,000 chuang an awm tawh thu tarlan a ni. Italy, Spain, France, Germany, Switzerland leh Britain ramte chu Europe-a he hri darh chakna ber an ni a, heng ramah hian Pathianni thleng khan he hri kai hi mi 37,000 chuang an awm tawh.
Buckingham Palace aṭangin Queen Elizabeth sawnchhuak
United Kingdom-a Covid-19 leng mek avangin Queen Elizabeth II chu Pathianni khan Buckingham Palace aṭangin Windsor Castle-ah a insawnchhuak a, a pasal Prince Philip pawh Sandringham estate-ah a insawn bawk. England lalnu hi a hriselna dinhmun a ṭha la, mahse venthawn thilah Windsor lamah sawn a nih thu official chuan a sawi. Buckingham Palace-ah hian thawktu 500 vel an awm a, Windsor-ah hian thlaktu 100 an awm bawk.
IS-in an mi leh sate Europe-a zin lo turin chah
Islamic State (ISIS) firfiak pawl chanchinbu 'Al-Naba' chuan Covid-19 vangin Europe-ah an mi leh sate chu zin lo turin a chah.
Europe-ah Covid-19 hi a darh mek a, hei vang hian ISIS firfiakte chuan hri leng laka inven nan an mi leh sate hi Europe-a kal lo turin an chah a ni. Europe bei tura Europe-a awmhmun khuar, an mi leh sate pawh hma la rih lo turin an chah bawk. ISIS chanchinbu Al-Naba hian an mi leh sa ram danga awmte chu an awmna hmun chhuahsan loa, inveng fimkhur turin an chah a, khuh emaw hahchhiau emaw chuan hmaikawr vuah turin leh invenna atan kut sil fai ṭha turin an chah bawk.
Airline-ten sum an hloh hnem dawn
Covid-19 vangin ram tam takin inkalpawhna an khar avangin khawvela Airline hrang hrangten May thla tawp lam khi chuan sum an hloh hnem thei dawn tih global aviation consultancy firm CAPA chuan a tarlang.
He hri hian sumdawnna a nghawng chho mek a, eng angin nge a nghawng chhoh zel dawn tih chu mithiamte ngaihven rawn a ni. Mahni ram ṭeuhah he hri hi a darh loh nana hmalakna hrang hrang kalpui mek a ni a, hei vang hian ramrite pawh khar a ni. Ram ṭhenkhatte chuan inzin tawn an phal tawh lo a, hei vang hian thlawhtheihna enkawltu Airline-ten an hlawkna tur sum tam tak an hloh phah thei dawn ta niin a lang.