Wuhan khawpuia chengte Covid test nei zo

China-a Wuhan khawpuiah tualchhung aṭanga hri kai hmuh­chhuah an awm leh avangin khawpuia cheng, mi maktaduai 11 chuangte chu Covid-19 test neih tir leh vek niin, Pathianni khan test hi an nei zo thei ta tih thuneitute chuan an sawi.

Mass test hi kar liam ta Thawhlehni aṭang khan neih a ni a, khawpuia cheng naupang kum ruk hnuai lam leh zirlai chawlh hmang mek tih lohte chu test hi neihsak vek an nih thu senior official Li Tao chuan a sawi a ni.

Test an neihna aṭang hian Inrinni liam ta khan tualchhung aṭanga hri kai mi 37 leh asymptomatic 41 hmuh chhuah an ni.

City official-te chuan kar liam ta khan Wuhan-a inhlawhfaa awm mi pasarihten hri an kai tih hmuh chhuah a nih hnuah, hri darh zel tur venna atan khawpuia chengte test leh vek an nih tur thu hi an sawi nghal a ni. Test neihna tur hi hmun 2,800-ah siam nghalin, health worker 28,000-ten an thawk zui nghal bawk.

July 20 hnu lamah China ram khawpui ṭhenkhatah Delta variant kai hmuh chhuah an awm avangin hri darh tur venna atan hian hma an la nghal a, khawpui ṭhenkhatah mass test hi kalpui a ni tawh.

Pathianni khan hri kai hmuh chhuah thar 125 awmin, heng zinga mi 94 chu tualchhung aṭanga kai an ni. A hma ni Inrinni khan tualchhung aṭanga kai mi 81 hmuhchhuah an lo ni tawh bawk. Pathiannia hri kai hmuh chhuah tam zawk hi Zhengzhou leh Yangzhou khawpuia mite an ni. Yangzhou-ah hian nimin khan mass test thawh ngana kalpui a ni a, Zhengzhou-ah pawh mass test thawh thumna an kalpui mek bawk.