Turkey leh Russia-in Syria-ah military patrol nei
Syria rama Idlib province-a M4 highway-ah military patrol thawhkhatna chu Turkey leh Russia-ten Pathianni khan an neih thu Turkish defence ministry chuan a tarlang.
He military patrol-ah hian Russia lam aṭangin an military police-te leh armoured vehicle ṭhahnem tak an tel a, Turkey lam aṭang hian sipai ṭhahnem tak bakah ralthuam chi hrang hrangte telh a ni bawk. Ram pahnihten patroling an neih chhan ber chu ramria firfiakte chetna tur ven a nih theih nan leh an inpawh tawn theih nana tih a ni bawk. Van lam leh lei lamah ven hna an thawk dun a ni.
M4 highway hi Idlib province-a awm a ni a, thla tira ram pahnihten inkahhai an puannaa inremna an ziah ṭum khan M4 highway-a military patrol neihna tur hi an tarlang tel a, hemi bawhzui hian hmalak zui a ni ta a ni. M4 highway hian Syria thlang leh chhak lam a pawh a, Latakia aṭangin Saraqib thleng a tan tlang a, Syria hmar lamah Turkey nen an inri bawk.
Inkaihhai puan vangin military patrol nei thei
March 5 khan Russia president Vladimir Putin leh Turkey president Recep Tayyip Erdogan-te chuan Russia khawpui Moscow-ah Idlib province-a remna leh muanna a awm theih nan inkahhai an puang a, kha inkaihhai puan
ṭuma ram pahnihte inremna ziahah khan military patrol neih dun hi a tel bawk a ni. Hemi hnu hian ram pahnihte chuan military patrol chu an nei chhunzawm ve leh nghal a ni. Turkey leh Russia inkar hi a ṭha chho zel dawn nia a lan thu khawtlang media-te chuan an sawi. Ram pahnihte hian inkahhai puang tho mah se, Idlib province-a Syria sipaiten inbeihna an thlen leh fo a nih chuan hma lak an hreh dawn loh thu Turkey president Erdogan chuan a sawi.
Military patrol a hlawhtling tawk lo : Russia
Russia lam chuan Pathiannia Turkey nen military patrol an neih zawh tak chu a hlawhtling tawk lo tih a sawi. A hlawhtlin tawk lohna chhan hi buaina a awm vang a nih thu an tarlang bawk.
Pathiannia military patrol, M4 highway-a neih zawh takah khan Russia do pawlin Russia chu tel ve lo turin an phut a, M4 highway-ah hian nawrh an lo hawihawt a ni. Hei vang hian Russia lam chuan kha military patrol neih zawh tak hi a hlawtling tawk loah a ngai.
Russia do pawlin Russia an duh loh chhan ber chu Syria-a Idlib province-a buaina thleng ṭhinah Russia chu mawhphurtu bera an puh vang a ni. Kum kaw chuang zet chu Syria-ah hian tualchhung indona a thleng tawh a, Russia chuan Syria president Bashar al-Assad an thlawp laiin Turkey lam hi chuan sorkar dodal lam an thlawp thung.