Israel sorkar siam turin Benny Gantz sawm dawn

Israel President Reuven Rivlin chuan eptu hruaitu, Blue and White party hotu Benny Gantz chu sorkar siam turin a sawm dawn tih a sawi. 

March 2-a inthlanpui neihah khan party mala sorkarna siam thei an awm lo. Prime minister Benjamin Netanyahu-a party, Likud Party chu seat la hnem ber ni mah se majority a nei pha lo. 

President Rivlin chuan seat 120 awmna, Parliament-a member nei party hrang hrangte a biak rawn hnuah, sorkar thar din tura member 61-ten Benny Gantz hi an thlawp zawk avangin Gantz hi a sawm dawn a ni. Hetih lai hian member 58 chuan prime minister ni lai Netanyahu chu an thlawp zawk thung. 

Israel hian nikum khan inthlanpui hi ṭum hnih an lo nei tawh a, mahse sorkar thar a ding thei lo a ni. Hei vang hian kumin March 2 khan inthlan hi an nei leh a, hei hi thla 12 chhunga inthlanpui ṭum thum an neihna a ni. Benny Gantz thlawptu zingah hian defence minister hlui, Avigdor Lieberman kaihhruai Yisrael Beiteinu party pawh a tel. 

Hetih lai hian PM Netanyahu-a eiruk thubuai ngaihtuah hun tur Covid-19 vangin sawn hlat a ni. Hri leng vang hian sorkar chuan punkhawm khapna a siam a, hei vang hian thubuai pawh hi ngaihtuah a ni dawn rih lo. Israel ramah hian he hri kai hi mi 210 an awm tawh a, sorkar chuan school, hotel, cinema, theatre leh hall te a khar bakah, mi 10 aia tam punkhawm khapnate a siam tawh a ni.