Germany-in Afghanistan-ah sipaite tirh tum tawh lo

Afghanistan-a Germany sipaite inkulhna ṭhin, Kunduz khawpui chu sipaite an chhuah hnuah Taliban firfiakten an lak hnuah Germany sipaite hi kir leh tura ngenna awm mah se tirh let an tum tawh lo tih an ram defence minister Annegret Kramp-Karrenbauer chuan a sawi.

Germany hi United States dawtah Afghanistan-a sipai dah lut hnem ber niin, kum 10 chhung Kunduz khawpuia firfiakte nen an inbeihnaah sipai tam tak chanin, Indopui II-na hnua an sipaite an chan hnem berna a ni.

Afghanistan aṭanga ram dang sipaite lakchhuah an nih hnuah Taliban firfiakte hian thuneihna chan tumin ṭan an la nghal a, an ram hmun hrang hrangah sorkar sipaite an bei a ni.

Ni li liam ta chhung khan Taliban-te hian provincial khawpui paruk chu sipaite kut aṭangin an chhuhsak tawh a, sipaite pawh hi an awmna hmun aṭangin an in inhnukdawk tawh.

Annegret Kramp-Karrenbauer chuan, "Kunduz leh Afghanistan hmun hrang hranga thil thleng chungchanga hriatte hian min ti na hle a ni," tiin Thawhṭanni khan a twitter-ah a sawi. Taliban firfiakte chet hluar chhoh leh meka ram dang sipaite thawn luh leh tura ngenna awmte chu chhangin, "Mipui leh parliament hian sipai thawnlut leha hun rei tak chhung indo kan duh em? Kan duh lo a nih chuan kan thawhpuite nena inhnukdawk tura kan inremna hi thuthlukna dik chu a ni," a ti.

Germany minister chuan Afghanistan-a sipai chakna tharthawh duhtute hian eng nge hlawhchhuah an tum a, eng kawng nge zawh an duh tih leh tunge an thawhpui ang tih inzawt hmasa turin a chah bawk.

Conservative party chhunga mite ngei pawhin German sipaite chu Taliban-te laka beihpui thlaknaa German sipaite chu tel leh turin an duh a, mahse Kramp-Karrenbauer erawh chuan firfiakte hneh tur chuan hun rei tak tak chhung na taka beih let an ngai dawn tih a sawi.

Kumin April thla khan US chuan Afghanistan-a an sipaite chu September 11 hmain lakchhuah vek an tum thu a puang a, hemi hnu hian NATO pawhin ṭangrual sipaite lakchhuah an nih tur hi a puang ve leh a, ram dang sipai awmte hi lakchhuah mek an ni.

Kramp-Karrenbauer chuan US President kalchhuak ta, Donald Trump chu Afghanistan-a beihpui thlakna neihte chu ngai pawimawh tawk loah a puh a, Taliban-te inremna a ziahpui chu buaina lo inṭan lehna chhanah a puh. Tuna Afghanistan tualchhung buaina thleng mek chu kum 2020-a Donald Trump-a'n US sipaite lachhuak tura Taliban-te inremna a lo siampuiin a nghawng ze la nih thu a sawi.

Taliban-te chuan Thawh­ṭanni khan provicial khawpui paruk an la tawh a, Samangana province khawpui Aibak chu sipaite nena inbeihna thleng loin an la a ni. Khawpuia chengte hian official-te hnenah inbeihna thlen tir lo turin an ngen a, an ngenna hi governor chuan pawmin khawpui aṭang hian sipaite chu a inhnuhdawk tir a, Taliban kutah khawpui hi a awm zui ta nghal a ni.