China-a Delta variant darh vangin official eng emaw zat hrem

China ramah Covid Delta variant darh vangin tun hnaiah hri kai thar an pung leh a, thla khat pawh tling loah hri kai thar, symptom nei hi mi 900 dawn hmuhchhuah a ni tawh. Official eng emaw zat chu hna thawk ṭha tawk loa puhin hrem an ni tawh.

Tualchhung hri darh thar leh chungchang ngaihthah leh, hri darh tur venna kawnga hma la ṭha tawk loha puhin official 30 chuang chu hrem an ni tawh a, an zingah hian mayor, local health director, hospital leh airport hotute pawh an tel.

Yangzhou khawpui thuneitute chuan mass testing kalpui danah thil ti dik tawk loah puhin, hei vang hian hri a darh phah nia sawiin official panga hnenah warning an pe tawh. He khawpui hi China rama hri kai tamna a ni chho mek a, Thawhṭanni khan hri kai 308 an awm a, an zinga mi paruk chu an dinhmun a ṭha lo hle. China ramah hian thla ruk chuang chu Covid-19 vanga thi an awm tawh lo a ni.

Beijing khawpuiah pawh local official-te chu China rama hri a darh leh chhan pakhatah mawhphurtuah puh an ni a, tualchhung aṭanga hri darh tur venna kawnga invenna leh khuahkhirhna te kalpui ṭha tawk loah puh an ni.