NKorea-in inter-Korean hotline call chhang duh lo

North Korea chuan US leh South Korea-in joint military drill an neih tur a duh loh thu sawia a vau hnuah, Thawhlehni khan inter-Korean hotline an hawn thar lehah routine call siam chu a chhang duh lo.

North Korea ram hotu lu ber, Kim Jong-un-a farnu, Kim Yo Jong chuan US-SKorea joint military drill neih tur hi a hmain na taka sawiselin, an kaltlangpui lui a nih chuan security lama vauna an la hmachhawn ngei tur thu pawh a lo sawi tawh a ni.

Kim Yo Jong-in he thu a sawi hnuah, tihdan phung pangngai anga inter-Korean hotline-a ram pahnih inbiak ṭhin chu NKorea lam hian a chhang duh ta lo a ni. Korea ram pahnihte inkar boruak ṭha lo avangin he hotline hi hun eng maw chen tihtawp a ni a, July thla tawp lam khan an inkar boruak siamṭha tura an hmalakna kal zelah an tinung ve leh chauh a ni.

Hotline kaltlang hian Korea ram pahnihte hian ni khatah ṭum hnih chanchin an inzawt ṭhin. Thawhlehni khan SKorea sipaiten zing lama an call chu NKorea official-te chuan ṭha takin lo dawngsawng mah se, chawhnu lamah an call erawh an la duh ta lo niin SKorea unification ministry chuan a sawi.