Algeria ram kangah mi ṭhahnem tak thi tawh

Algeria khaw­pui,Algiers khaw chhak lama Kabylie biala ram kang nasa tak chhuak vangin sipai 25 leh tualchhung mi 17 an thi tih prime minister Aymen Benabderrahmane chuan a sawi.

Kabylie biala ram kang an ṭhelhnaah sipai ṭhahnem takin hliam an tuar bawk.

Tun hnaiah Mediter­ranean ram eng emaw zat chuan ram kang hi an tuar a, Turkey, Greece, Lebanon leh Cyprus ramah pawh ram kang avangin chhiatna nasa tak a thleng mek. Boruak inthlak danglam chak tak te, khaw lum leh boruak ro bawk siin ram kang hi a tizual nia sawi a ni.

Industrial era ṭantirh aṭang khan khawvel hi 1.2C velin a lum belh tawh a, ram tina sorkarten boruak chhia an siamchhuah an titlem hret hret a nih loh chuan temperature hi a san belh zel dawn a ni.

Algerian province 17-a hmun 100 velah kangmei hi a chhuak niin official news agency APS chuan a sawi.

President Abdel­madjid Tebboune chuan nunna chan ta sipaite zahna hlanin an chhungte a tawrhpui thu a sawi a, heng sipaite hian Bejaia leh Tizi Ouzou tlanga cheng mi 100 chuangte chu him takin an chhanchhuak hman tih a sawi bawk.

Interior Minister Kamel Beldjoud chuan kang mei chhuak zinga hmun 50 ami chu misualte thiltih a nih thu a sawi.